શહેરના પોરબંદર નેશનલ હાઇવે રોડ ઉપર આવેલ પટેલ કોટનમાં ગ્રાઉન્ડમાં પડેલ ૨૫ જેટલી ગાડીના કપાસમાં સાંજના સુમારે અચાનક આગ લાગતા ભારે નાસભાગ મચી જવા પામી હતી. આ ઘટનાની જાણ થતાં ઉપલેટા–ધોરાજીના ફાયર ફાઇટરો દ્રારા ત્રણ કલાકે આગને કાબૂમાં લેવામાં આવી હતી. હાલના તબકકે લાખોની નુકસાનીનો અંદાજ લગાવાઇ રહ્યો છે.
ઉપલેટા–પોરબંદર હાઇવે રોડ પર ઇરારાના પાટીયા પાસે આવેલ પટેલ કોટનના ગ્રાઉન્ડમાં પડેલ ૨૦થી ૨૫ જેટલી ગાડીના કપાસમાં અચાનક અકસ્માતે આગ લાગતા ભારે અફડાતફડી મચી ગઇ હતી. આગના ગોળા ખેતરોમાં કામ કરતા ખેતમજૂરોએ જોતા ભારે નાસભાગ મચી જવા પામી હતી. પટેલ કોટનના ગ્રાઉન્ડમાં પડેલ બે અલગ અલગ ઢગલામાં આગ લાગવાની ઘટનાની જાણ થતાં ઉપલેટા તેમજ ધોરાજી નગરપાલિકાના ફાયર ફાઇટરો ઘટના સ્થળે ધસી આવ્યા હતાં. ત્રણ કલાકની જહેમત બાદ આગને કાબૂમાં લેવામાં આવી હતી. કપાસમાં આગ લાગતા જ ગ્રાઉન્ડમાં પડેલા ઢગલાને મજુરો અને આજુબાજુના લોકો દ્રારા પાણીનો છંટકાવ કરી આગ ઓલવવાના પ્રયાસો કર્યા હતા પણ ધોરાજી–ઉપલેટાના ફાયર ફાઇટરો ઘટના સ્થળે પહોંચે તે પહેલા બન્ને ઢગલામાં આગ ભભૂકી ઉઠી હતી. ત્રણ કલાકની જહેમત બાદ આગ કાબૂમાં લેવાઇ હતી. હાલ પ્રાથમિક ધોરણે લાખોની નુકસાનીનો અંદાજ સેવાઇ રહ્યો છે