જિલ્લા કલેકટર અને ચીફ ઓફિસરો દ્વારા ઝીરો વેસ્ટ બાબતે ચર્ચા

દેવભૂમિ દ્વારકા જિલ્લાના મુખ્ય મથક ખંભાળિયા ખાતે સૌરાષ્ટ્ર ઝોનના પ્રાદેશિક નગરપાલિકાના નિયામક દ્વારા ખાસ બેઠક યોજવામાં આવી હતી. અહીંના જિલ્લા કલેકટર તેમજ તમામ છ પાલિકાઓના ચીફ ઓફિસરોની ઉપસ્થિતિમાં ઝીરો વેસ્ટ તેમજ પાણી સહિતના મહત્વના બાબતે ચર્ચા વિચારણાઓ કરવામાં આવી હતી.

સૌરાષ્ટ્ર વિસ્તારના પ્રાદેશિક નિયામક તરીકે ફરજ બજાવતા અધિકારી જાની દ્વારા ખંભાળિયા ખાતે ખંભાળિયા, સલાયા, ભાણવડ, રાવલ, દ્વારકા અને ઓખા એમ દ્વારકા જિલ્લાની તમામ છ નગરપાલિકાના ચીફ ઓફિસરો તેમજ ઈજનેરો સહિતના અધિકારીઓ સાથે યોજાયેલી મહત્વની બેઠકમાં જિલ્લા કલેકટર જી.ટી. પંડ્યા અને જિલ્લા વિકાસ અધિકારી એસ.ડી. ધાનાણી દ્વારા ખાસ બેઠકનું આયોજન કરવામાં આવ્યું હતું. જેમાં દરેક નગરપાલિકાઓમાં તાજેતરના ભારે વરસાદની પરિસ્થિતિમાં થયેલા નુકસાનની તેમજ પાણીની પરિસ્થિતિ ઉપરાંત દરેક નગરપાલિકાઓમાં ચાલતા ઈ.એમ.આર.ના કામોની પાલિકા દ્વારા કરવામાં આવેલી કામગીરી સંદર્ભેની સમીક્ષા કરવામાં આવી હતી.

આટલું જ નહીં, આ બેઠકમાં દરેક નગરપાલિકા દ્વારા પોતાના કાર્યક્ષેત્રમાં કોઈ પણ કચરો જમા ન થાય અને કચરાનો તાકીદે યોગ્ય નિકાલ થાય તે માટે ઝીરો વેસ્ટની કામગીરી ઉપરાંત સ્થાનિક કક્ષાએ પાણી પુરવઠા વિભાગની વર્તમાન સ્થિતિ અંગેની ચર્ચા સાથે નિયામક દ્વારા જરૂરી માર્ગદર્શન આપવામાં આવ્યું હતું.

આ બેઠકમાં ખંભાળિયા નગરપાલિકાના ચીફ ઓફિસર ભરતકુમાર વ્યાસ, દ્વારકાના ચીફ ઓફિસર ઉદય નસીત, ઓખાના શુક્લા, સલાયાના પંડ્યા, રાવલ સહિતના ચીફ ઓફિસર ઉપરાંત ખંભાળિયાના ઈજનેર એન.આર. નંદાણીયા વિગેરે ઉપસ્થિત રહ્યા હતા. આ મિટિંગ બાદ નિયામક દ્વારા ખંભાળિયા નગરપાલિકાના અત્રે સુમરા તરઘરી ગામે આવેલા ડમ્પિંગ સ્ટેશનની પણ મુલાકાત લેવામાં આવી હતી.