રવિવારની વહેલી સવારે જ્યારે આખું રાજકોટ શહેર ગાઢ નિદ્રામાં હતું, ત્યારે શહેરના સ્પીડવેલ પાર્ટી પ્લોટ પાસે આવેલી અંબિકા ટાઉનશીપમાં આગની ઘટના બની હતી. અહીં આવેલી વ્રજ હાઈટ્સ નામની ઇમારતના પાંચમા માળે વહેલી સવારે ૩.૩૦ કલાકે અચાનક આગ ફાટી નીકળતા ચકચાર મચી ગઈ હતી. આગની જ્વાળાઓ એટલી વિકરાળ હતી કે જોતજોતામાં તેણે આખા ફ્લેટને લપેટમાં લઈ લીધો હતો.

ધુમાડાના ગોટા અને આગની જ્વાળાઓથી ગુંજી ઉઠ્યો વિસ્તાર

પ્રાપ્ત વિગતો અનુસાર, વહેલી સવારે આશરે સાડા ત્રણ વાગ્યાના સુમારે પાંચમા માળના ફ્લેટમાંથી ધુમાડાના ગોટા અને ભડકે બળતી જ્વાળાઓ દેખાવા લાગી હતી. આસપાસના રસ્તા પરથી પસાર થતા લોકો અને પાડોશીઓએ બૂમાબૂમ કરતા લોકો નિદ્રામાંથી જાગી ગયા હતા. આગે આખા માળને લપેટમાં લેતા ઇમારતમાં રહેતા અન્ય પરિવારોમાં પણ ફાળ પડી હતી અને લોકો જીવ બચાવવા માટે નીચે દોડી આવ્યા હતા.

ફર્નિચરના કામને લીધે આગ બની વધુ ભયાનક બની

પ્રાથમિક તપાસમાં બહાર આવ્યું છે કે જે ફ્લેટમાં આગ લાગી હતી, ત્યાં હાલમાં ફર્નિચરનું કામ ચાલી રહ્યું હતું. ઘરમાં રાખવામાં આવેલું લાકડું, પ્લાયવુડ, ફેવિકોલ અને પોલિશ માટે વપરાતા જ્વલનશીલ કેમિકલ્સને કારણે આગે રૌદ્ર સ્વરૂપ ધારણ કર્યું હતું. આ જ્વલનશીલ સામગ્રીના કારણે આગ ઝડપથી પ્રસરી હતી, જેને કારણે ફાયર ફાઈટરોને પણ આગ બુઝાવવામાં ભારે જહેમત ઉઠાવવી પડી હતી.

યુદ્ધના ધોરણે રેસ્ક્યુ ઓપરેશન અને મેડિકલ કાફલો

ઘટનાની ગંભીરતાને જોતા રાજકોટ ફાયર બ્રિગેડની ટિમ તાત્કાલિક હરકતમાં આવી હતી.

ફાયર ફાઈટરો: ૪થી ૫ ફાયર ફાઈટરો ઘટનાસ્થળે પહોંચી ગયા હતા અને પાંચમા માળ સુધી પાણીનો મારો ચલાવી આગ પર કાબૂ મેળવવાનો પ્રયાસ શરૂ કર્યો હતો.

૧૦૮ એમ્બ્યુલન્સ: કોઈપણ જાનહાનિ કે ઈમરજન્સી સ્થિતિને પહોંચી વળવા માટે ૩ થી ૪ એમ્બ્યુલન્સનો કાફલો સ્થળ પર તૈનાત કરી દેવામાં આવ્યો છે.

પોલીસ બંદોબસ્ત: ઉચ્ચ પોલીસ અધિકારીઓનો કાફલો પણ ઘટનાસ્થળે પહોંચ્યો હતો જેથી ભીડને નિયંત્રિત કરી શકાય અને રેસ્ક્યુ ઓપરેશનમાં અવરોધ ન આવે.

આગ લાગવાનું કારણ હજુ સુધી અકબંધ છે, પરંતુ પ્રાથમિક અનુમાન મુજબ શોર્ટ સર્કિટના કારણે આ હોનારત સર્જાઈ હોવાની શક્યતા છે. હાલ ફાયર બ્રિગેડ દ્વારા 'કૂલિંગ પ્રક્રિયા' હાથ ધરવામાં આવી રહી છે અને સમગ્ર વિસ્તારને કોર્ડન કરી દેવાયો છે.

View this post on Instagram

A post shared by Aajkaal (@aajkaaldaily)