ચીનના ઝેજિયાંગ પ્રાંતના હાંગઝોઉ શહેરમાં આ વર્ષે 'મે ડે'ની રજાઓ દરમિયાન એક ખાસ પ્રકારની 'પોલીસ ફોર્સ' તૈનાત કરવામાં આવી છે. આ દેશની પ્રથમ રોબોટ ટ્રાફિક પોલીસ ટુકડી છે, જેણે શુક્રવારથી સત્તાવાર રીતે પોતાની ફરજ શરૂ કરી છે. પાંચ દિવસની મે ડે રજાઓ દરમિયાન ટ્રાફિકનું નિયમન કરવા માટે આ અત્યાધુનિક વ્યવસ્થા કરવામાં આવી છે.

૧૫ રોબોટની ટુકડી કરશે પેટ્રોલિંગ
આ રોબોટ ટ્રાફિક પોલીસની ટીમમાં ૧૫ અત્યાધુનિક ઇન્ટેલિજન્ટ ટ્રાફિક મેનેજમેન્ટ રોબોટ્સનો સમાવેશ થાય છે. આ રોબોટ્સ વેસ્ટ લેક એવન્યુ, યાન-આન રોડ અને વેસ્ટ લેક સીનિક સ્પોટની આસપાસના મુખ્ય વિસ્તારોમાં નિયમિતપણે પેટ્રોલિંગ કરી રહ્યા છે.

માનવ અને રોબોટનું સંયુક્ત કાર્ય
આ રોબોટ્સની કાર્યપદ્ધતિ વિશે જાણવા મળ્યું છે કે તેઓ અલગ-અલગ ટ્રાફિક પોઈન્ટ્સ અને પરિસ્થિતિઓ મુજબ પોતાની ભૂમિકા ભજવશે. આ નવી 'હ્યુમન-મશીન સિનર્જી' (માનવ-મશીન સહયોગ) મોડેલ હેઠળ ટ્રાફિક પોલીસ અધિકારીઓ અને રોબોટ્સ એકબીજાના પૂરક બનીને કામ કરશે, જેથી ટ્રાફિક વ્યવસ્થા વધુ કાર્યક્ષમ બને.

ચીન ન્યૂઝ સર્વિસ (CNS) દ્વારા આપવામાં આવેલી માહિતી મુજબ આ રોબોટ્સ રજાઓના સમયગાળામાં વધતા ટ્રાફિકને નિયંત્રિત કરવામાં ખૂબ જ ઉપયોગી સાબિત થઈ રહ્યા છે. ટેકનોલોજીના માધ્યમથી સુરક્ષા અને ટ્રાફિક મેનેજમેન્ટમાં કરવામાં આવેલો આ પ્રયોગ વિશ્વભરના લોકો માટે આકર્ષણનું કેન્દ્ર બન્યો છે.