ગુજરાતના સિંહોના ગઢ ગણાતા અમરેલી જિલ્લાના રાજુલા તાલુકાના કોવાયા ગામ નજીકથી એક અત્યંત હૃદયદ્રાવક, કંપારી છૂટી જાય તેવી અને અરેરાટીભરી ઘટના સામે આવી છે. અહીં એક સિંહણે પરપ્રાંતીય યુવક પર ઘાતકી અને હિંસક હુમલો કરી તેને પોતાનો શિકાર બનાવ્યો હતો. આ આક્રમણ એટલું ભયાનક હતું કે સિંહણ યુવકનું આખું શરીર ખાઈ ગઈ હતી. ઘટનાસ્થળેથી વનવિભાગ અને સ્થાનિક લોકોને માત્ર અડધું ખાધેલું માથું અને પાંસળીના ટુકડા જ અવશેષ રૂપે મળી આવ્યા છે, જેના કારણે સમગ્ર પંથકમાં ભારે અરેરાટી સાથે ભય અને રોષનો માહોલ વ્યાપી ગયો છે.

વતન જવા નીકળેલા પ્રકાશ ચંદ્ર બન્યા સિંહણનો કોળિયો

મળતી માહિતી મુજબ, મૃતક યુવકની ઓળખ પ્રકાશ ચંદ્ર તરીકે થઈ છે, જે મૂળ ઉત્તરાખંડનો વતની હતો અને અહીં સ્થાનિક હોટલ-રેસ્ટોરન્ટમાં કામ કરીને પોતાનું ગુજરાન ચલાવતો હતો. મોડી રાત્રે પ્રકાશ ચંદ્ર પોતાના વતન જવા માટે હોટલેથી ખુશખુશાલ થઈને નીકળ્યો હતો. તે દરમિયાન કોવાયા ગામ નજીક અંધારામાં ટાંપ લગાવીને બેઠેલી સિંહણે તેના પર ઓચિંતો અને જીવલેણ હુમલો કર્યો હતો. સિંહણ યુવકને બચકાં ભરીને અને ઢસડીને નજીકની ઝાડીઓમાં લઈ ગઈ હતી, જ્યાં તેણે યુવકનું માથું ધડથી અલગ કરી નાખ્યું હતું અને આખું શરીર ફાડી ખાધું હતું. સવારે ઘટનાની જાણ થતાં જ સ્થાનિક લોકો ઘટનાસ્થળે દોડી આવ્યા હતા, જ્યાં માત્ર ખોપરી અને હાડકાના અવશેષો જોઈને લોકોના કાળજા કંપાવા લાગ્યા હતા.

કંપનીના કર્મચારીઓની વ્યથા અને વનવિભાગ સામે ભારે રોષ

આ ઘાતકી ઘટનાને પગલે સ્થાનિક લોકો અને શ્રમિકોમાં વનવિભાગની કામગીરી સામે ભારે રોષ જોવા મળી રહ્યો છે. સ્થાનિક ખાનગી કંપનીના કર્મચારી અમરુભાઈ વાઘે પોતાની વ્યથા ઠાલવતાં જણાવ્યું હતું કે, અહીં આસપાસ પાંચ-સાત મોટી કંપનીઓ આવેલી છે, જેમાં હજારો લોકો દિવસ-રાત અલગ-અલગ શિફ્ટમાં નોકરી કરે છે. અહીં અવારનવાર વનરાજ કુતરાની જેમ ખુલ્લેઆમ આંટા મારતા હોય છે, જેના કારણે રાત્રિ કે વહેલી સવારની શિફ્ટમાં અવરજવર કરવામાં કર્મચારીઓને ભારે તકલીફ અને ડરનો સામનો કરવો પડે છે.

તેમણે વધુમાં આક્રોશ સાથે ઉમેર્યું કે, જો કોઈની પાસે ફોર-વ્હીલર ગાડી હોય તો જ તે વ્યક્તિ અહીં સુરક્ષિત છે, બાકી ટુ-વ્હીલર પર કે પગપાળા જતાં ગરીબ મજૂરો અને લોકો માટે અહીં કોઈ સેફ્ટી બચી નથી. વનવિભાગ આ બાબતે તાત્કાલિક કડક એક્શન લે અને લોકોની સુરક્ષા માટે કાયમી ધોરણે વનકર્મીઓ તહેનાત કરે તે ખૂબ જ જરૂરી છે. આ વિસ્તારમાં સિંહોની અવરજવર સતત ચાલુ જ રહે છે. દિવસે કે રાતે ગમે ત્યારે ગમે ત્યાં સિંહો જોવા મળે છે. અત્યારની જ વાત કરીએ તો, જે કંપનીમાં લોકો કામ કરે છે તેના ગેટની બિલકુલ આગળ જ આઠ સિંહ શાંતિથી બેઠા છે, જે કોઈપણ સમયે હિંસક બની શકે છે.

વનવિભાગનો મોટો કાફલો ઘટનાસ્થળે તહેનાત

આ ભયાનક ઘટનાની જાણ થતાં જ રાજુલા રેન્જ વનવિભાગની ટીમ તાત્કાલિક હરકતમાં આવી સ્થળ પર દોડી ગઈ હતી અને આગળની કાયદેસરની કાર્યવાહી હાથ ધરી હતી. ઘટનાની ગંભીરતાને જોતા પાલીતાણા શેત્રુંજી ડિવિઝનના એસીએફ (ACF) વિરલ સિંહ ચાવડા અને આરએફઓ (RFO) સહિતનો વન વિભાગનો મોટો કાફલો ઘટનાસ્થળે અને આસપાસના વિસ્તારોમાં તહેનાત કરી દેવામાં આવ્યો છે. સ્થાનિક લોકોમાં ફેલાયેલા રોષ અને ભયને શાંત કરવા તેમજ નરભક્ષી બનેલી આ સિંહણને ઝડપી લેવા માટે વનતંત્ર દ્વારા યુદ્ધના ધોરણે આયોજન કરવામાં આવ્યું છે. આ વિસ્તારમાં સિંહોની અવરજવર સામાન્ય હોવા છતાં, આ પ્રકારનો માનવભક્ષી હુમલો થતાં વન વિભાગની ચિંતામાં પણ મોટો વધારો થયો છે.

નરભક્ષી સિંહણને પાંજરે પૂરવા વનવિભાગનું 'મેગા ઓપરેશન'

વનવિભાગ દ્વારા આ નરભક્ષી સિંહણને પકડવા માટે એક મોટું મેગા ઓપરેશન શરૂ કરવામાં આવ્યું છે. ઘટનાસ્થળની આસપાસ આવેલા ગાંડા બાવળની ગીચ ઝાડીઓમાં સિંહણ સહિત અન્ય સિંહો પણ છુપાયેલા હોવાની આશંકાને પગલે વનવિભાગે સમગ્ર વિસ્તારને ચારેય તરફથી કોર્ડન કરી લીધો છે, જેથી સિંહણ અન્ય કોઈ રહેણાક કે ગ્રામ્ય વિસ્તાર તરફ ભાગી ન શકે અને કોઈ અન્ય નિર્દોષ વ્યક્તિને નિશાન ન બનાવે. વન્યજીવ ડૉક્ટરોની વિશેષ ટીમો પણ આધુનિક બચાવ સામગ્રી સાથે ઘટનાસ્થળે પહોંચી ગઈ છે અને સિંહણને પાંજરે પૂરવા અથવા ટ્રેન્ક્યુલાઈઝ ગનથી બેભાન કરવા માટેની તજવીજ હાથ ધરવામાં આવી છે. આ ઘાતકી ઘટનાને પગલે વન વિભાગે સ્થાનિક ગ્રામજનો અને મજૂરોને રાત્રિના સમયે સીમ વિસ્તારમાં એકલા બહાર ન નીકળવા અને પૂરતી સાવચેતી રાખવા માટે કડક સૂચનાઓ જારી કરી છે.