જુના જમાનામાં દરબાર સમાજમાં લગ્નની જાનમાં ગાડા ઘોડેસવારો ઉંટગાડી સહિતની જાજરમાન જાનો જોવા મળતી હતી. આવી જાજરમાન જાન ગુંદીયાળા ગામે જોવા મળી હતી. મેંદરડા તાલુકાના ગુંદિયાળી ગામના કાઠી દરબાર ખોડુભાઇ લાલુંના પુત્ર રાજભાઇ લાલુંની જાન જુના રજવાડાને યાદ કરાવે એવી જોવા મળી હતી.આ જાજરમાન જાનમાં ઘોડેસવારો, બળદ ગાડાઓ, ઉંટ સવારી, હાથીની સવારી, બગી, શણગારેલ રથ, બે ઘોડાવાળા રથમાં આ જાન બેન્ડ પાર્ટીની સાથે ગુંદિયાળાથી ઠાઠ માઠ સાથે નીકળી સાસણના ગ્રીનવુડ રિસોર્ટ ખાતે ચાર કલાકે પહોંચી હતી.બે કિલોમીટર આસપાસની લાંબી આ જાજરમાન જાનમાં ઘોડે સવારો, ઉંટ સવારો, બળદગાડાઓ, ખુલ્લી જીપ, બગી, હાથીની અંબાડી તેમજ ૧૦૦થી વધુ ફોર વ્હીલ રજવાડી પોશાક સાથે ડી.જે. બેન્ડ પાર્ટી સાથે કાઠી દરબારના લાલું પરિવારની આ જાનને જોવા લોકોના ટોળેટોળા પણ ઉમટી પડયા હતાં. આમ ખોડુભાઇ લાલું તેમના પુત્ર રાજભાઇના લગ્ન જુના રીત રિવાજ રાજાશાહીના જમાનાને યાદ કરાવે એ રીતે ખૂબ જ ધામધૂમથી કર્યા હતાં. તેમાં ભવ્ય લોકડાયરાનું આયોજન કરવામાં આવ્યું હતું. જેમાં રાજભા ગઢવી, હર્ષદાન સુરુ, ચિતુદાન ગઢવી, દેવરાજભાઇ ગઢવી, લલીતાબેન ઘોડાદરા, મંજુલાબેન ગોસ્વામી જેવા નામી કલાકારો હાજર રહ્યા હતાં. જેમાં જુના લગ્ન ગીતોની રમઝટ બોલી હતી. અને ચલણ નોટોનો વરસાદ થયો હતો. રાજકીય આગેવાનો પણ મોટી સંખ્યામાં જોવા મળ્યા હતાં.