દિલ્હીના સરિતા વિહાર વિસ્તારમાં પેસેન્જર ટ્રેનના કોચમાં ભીષણ આગ લાગી હતી. આ ઘટના સાંજે 4.24 કલાકે બની હતી. ઘટનાની જાણ થતાં જ ફાયર બ્રિગેડની 6 ગાડીઓ ઘટનાસ્થળે પહોંચી હતી અને આગને કાબુમાં લીધી હતી. આગના કારણે કોઈ જાનહાનિના અહેવાલ નથી. ટ્રેન ઝાંસી જવા નીકળી હતી.

ત્રણ કોચમાં લાગી હતી આગ

ડીસીપી રેલ્વેએ જણાવ્યું કે ટ્રેનમાં આગની માહિતી પીસીઆરને સાંજે 4.41 કલાકે મળી હતી. આ ટ્રેન દિલ્હી-આગ્રા વચ્ચે ચાલે છે. ઓખલા રેલવે સ્ટેશન પહેલા ટ્રેનમાં આગ લાગી હતી. આગ લાગ્યા બાદ ટ્રેનને રોકી દેવામાં આવી હતી. આ ઘટનામાં કોઈને ઈજા થઈ ન હતી, કારણ કે કોચમાં બેઠેલા મુસાફરો અન્ય કોચમાં ખસી ગયા હતા અથવા નીચે ઉતરી ગયા હતા. રેલવે દ્વારા આગળની કાર્યવાહી હાથ ધરવામાં આવી રહી છે.

પ્રથમ આગ D3 કોચમાં લાગી

જ્યારે ટ્રેન હરકેશ નગર પાસે પહોંચી ત્યારે ટ્રેનના D3 કોચમાં અચાનક આગ લાગી હતી. આ દરમિયાન કોચની અંદર 15 થી 20 મુસાફરો બેઠા હતા. જ્યારે મુસાફરોએ ટ્રેનની અંદર આગ જોઈ તો તેમણે ચેઈન ખેંચીને ટ્રેનને રોકી હતી. આ પછી એક પછી એક તમામ મુસાફરો નીચે ઉતરી ગયા.