ચીનના ચાંગે-5 મિશન દ્વારા પૃથ્વી પર લાવવામાં આવેલા ચંદ્રના નમૂનાઓમાં એક નવા પ્રકારનું મોલેક્યુલર સ્ટ્રક્ચર મળી આવ્યું છે, જેમાં પાણી હાજર છે. ચીનના સરકારી મીડિયાના અહેવાલ મુજબ, પ્રથમ વખત એવું જાણવા મળ્યું છે કે ચંદ્રની સપાટી પર હાઇડ્રોક્સિલ જૂથના રૂપમાં પાણી અથવા બરફ હાજર છે. તેમજ સ્ફટિકીય પાણીના પરમાણુઓ છે. નેચર એસ્ટ્રોનોમી જર્નલમાં પ્રકાશિત સંશોધનમાં કહેવામાં આવ્યું છે કે ચંદ્રની સપાટી પર પાણીના અણુઓ અને એમોનિયમના વાસ્તવિક સ્વરૂપ વિશે માહિતી મળી છે. શોધાયેલ ખનિજની રચના પૃથ્વીના જ્વાળામુખીની નજીક મળી આવતા ખનિજો જેવી જ છે. ચાઈનીઝ વૈજ્ઞાનિકોનું કહેવું છે કે ચંદ્રની સપાટી પર જ્યાં સૂર્યપ્રકાશ આવે છે ત્યાં પાણીના અણુઓ હાઈડ્રેટેડ ક્ષારના સ્વરૂપમાં હાજર હોઈ શકે છે. સંશોધકોનું કહેવું છે કે આ શોધ ભવિષ્યમાં ચંદ્ર પર પાણીના સ્ત્રોતોના વિકાસ માટે નવી શક્યતાઓ ખોલશે. ચીન સતત ચંદ્ર પર મિશન મોકલી રહ્યું છે. તેણે 2020માં ચાંગે-5 મિશન મોકલ્યું હતું. આ પછી ગયા મહિને તેનું રોબોટિક ચાંગે-6 મિશન સફળતાપૂર્વક પૂર્ણ થયું હતું. ચાંગે-6 મિશન ચંદ્રના દૂરના વિસ્તારમાંથી સેમ્પલ લઈને પરત ફર્યું હતું. આ વિસ્તાર પૃથ્વી પરથી દેખાતો નથી. વિશ્વમાં પ્રથમ વખત કોઈ મૂન મિશન આ જગ્યાએથી સેમ્પલ લઈને આવ્યું છે. ચીનના વૈજ્ઞાનિકોને આશા છે કે આ નમૂનાઓથી ચંદ્ર વિશે પણ નવી માહિતી મળશે.