પરિવાર તથા વેપારી વર્તુળોમાં શોકનું મોજુ : પોલીસ દ્વારા કરાતી તપાસ

જામનગર-ખંભાળિયા હાઇવે પર સિક્કા પાટીયા પાસે ગઇ રાત્રે બંધ પડેલા ટ્રકની પાછળ કાર ઘુસી જતાં જામનગરના આશાસ્પદ વેપારી યુવાનનું ગંભીર ઇજા થવાથી મૃત્યુ નીપજયું છે. જે બનાવને લઈને પરિવાર તથા વેપારી વર્તુળોમાં ભારે શોકનું મોજું ફરી વળ્યું છે.
જામનગરમાં લીમડાલેન વિસ્તારમાં રહેતા અને બેડીગેઇટ વિસ્તારમાં જયંતીભાઈ માવાવાળા નામથી વેપારી પેઢી ચલાવતા વિજયભાઈ જયંતીભાઈ દુબલ (ઉંમર ૪૭) નામના વેપારી ગઈકાલે પોતાના વેપારના પૈસાની લેતી-દેતી ના કામ માટે પોતાની કાર લઈને જામનગરથી ખંભાળિયા ગયા હતા, અને ત્યાંથી મોડી સાંજે જામનગર પરત ફરી રહ્યા હતા.
 દરમિયાન સિક્કા પાટીયા પાસે માર્ગ પર બંધ પડેલા એક ટ્રકની પાછળ કાર ધડાકાભર અથડાઈ પડતાં ગોઝારો અકસ્માત સર્જાયો હતો. જે અકસ્માતમાં જામનગરના આશાસ્પદ વેપારી યુવાન વિજયભાઈ દુબલનું ગંભીર ઇજા થવાના કારણે કરુણ મૃત્યુ નીપજયું હતું. આ બનાવની જાણ થતાં મૃતકના પરિવાર અને વેપારી વર્તુળમાં શોકનું મોજું ફરી વળ્યું હતું.
બનાવની જાણ થતા મેઘપર પોલીસ સ્ટેશનનો સ્ટાફ ઘટના સ્થળે દોડી ગયો હતો અને જી.જી. હોસ્પિટલમાં પોસ્ટ મોર્ટમ કરાવ્યું હતું, જયારે આ અકસ્માત ના બનાવ અંગે વધુ તપાસ હાથ ધરી છે.