ભાગેડુઓ કે ગુનેગારોને આશ્રય આપીશું નહીં, ન્યાયથી બચવા માટે અમારી નાગરિકતાનો ઉપયોગ કરનારાઓ માટે અમે શૂન્ય સહિષ્ણુતા રાખીએ છીએ: પીએમ જોથમ નાપટે ભારતના ભાગેડુ ઉદ્યોગપતિ અને ભૂતપૂર્વ આઈપીએલ ચરમેન લલિત મોદીએ સોશિયલ મીડિયા પર વાનુઆતુની તસવીરો પોસ્ટ કરી છે અને આ દેશને સ્વર્ગ જેવો સુંદર ગણાવ્યો છે. લલિત મોદી દ્વારા પોસ્ટ કરાયેલી તસવીરોમાં તેઓ પોતે વાનુઆતુમાં જોવા મળે છે. લલિત મોદીએ આ દેશની પ્રશંસા કરી છે અને લખ્યું છે કે તમારે આ દેશની મુલાકાત ચોક્કસ લેવી જોઈએ.

જોકે, લલિત મોદીની ખુશી અલ્પજીવી હોઈ શકે છે. કારણ કે વાનુઆતુના વડા પ્રધાન જોથમ નાપટે તેમના દેશના પાસપોર્ટ અધિકારીઓને લલિત મોદીનો પાસપોર્ટ રદ કરવાનો આદેશ આપ્યો છે. પીએમ જોથમ નાપટે કહ્યું છે કે વાનુઆતુ ક્યારેય ગુનેગારોને આશ્રય આપશે નહીં. તેમણે કહ્યું કે જે લોકો ન્યાયિક પ્રક્રિયાનો સામનો કરવાથી બચવા માટે વાનુઆતુની નાગરિકતા લેવા માંગે છે તેઓ ક્યારેય સફળ થશે નહીં.પીએમ જોથમ નાપટે આવા લોકોને ચેતવણી આપી હતી કે મારો સંદેશ ખૂબ સ્પષ્ટ છે કે, વડા પ્રધાન તરીકે, અમે ભાગેડુઓ કે ગુનેગારોને આશ્રય આપીશું નહીં. ન્યાયથી બચવા માટે અમારી નાગરિકતાનો ઉપયોગ કરનારાઓ માટે અમે શૂન્ય સહિષ્ણુતા રાખીએ છીએ. જો તમારો આ જ ઇરાદો છે, તો હું તમને બીજે ક્યાંય જવાની સલાહ આપું છું.

આમ છતાં, લલિત મોદીએ વાનુઆતુ ની તસવીરો પોસ્ટ કરી છે અને લોકોને સલાહ આપી છે કે આ દેશને પણ તેમની મુસાફરી યાદીમાં સામેલ કરવો જોઈએ. લલિત મોદીએ વાનુઆતુ માં પોતાના ફોટા પોસ્ટ કર્યા અને કહ્યું, વાનુઆતુ એક સુંદર દેશ છે. તમારે તેને તમારી બકેટ લિસ્ટમાં સામેલ કરવો જ જોઈએ. પ્રદૂષણ અને ઘોંઘાટથી દૂર. ખરેખર સ્વર્ગ જેવો સુંદર દેશ,"

ઉલ્લેખનીય છે કે ભારતમાં ઘણા કેસોમાં વોન્ટેડ લલિત મોદીએ પોતાની ભારતીય નાગરિકતાનો ત્યાગ કર્યો હતો. તેમણે લંડનમાં ભારતીય હાઈ કમિશનમાં પોતાનો પાસપોર્ટ સરેન્ડર કર્યો અને વાનુઆતુ નાગરિકતા લીધી.ઓસ્ટ્રેલિયા નજીક સમુદ્રથી ઘેરાયેલો વાનુઆતુ ખરેખર સુંદર દેશ છે. સમુદ્રમાં સ્થિત નાના દેશોની સરકારો રોકાણોને આમંત્રણ આપવા માટે વિશ્વના ધનિક લોકોને તેમની નાગરિકતા વેચે છે. લલિત મોદીના કિસ્સામાં પણ આવું જ બન્યું છે. વાનુઆતુ પણ આવી જ રીતે નાગરિકતા આપે છે. આને રોકાણ દ્વારા નાગરિકતા કાર્યક્રમ કહેવામાં આવે છે.

લલિત મોદીના કેસ અંગે, વાનુઆતુ ના વડા પ્રધાને કહ્યું, અમે સ્વીકારીએ છીએ કે આ કેસના કેન્દ્રમાં રહેલી વ્યક્તિ પર એવા આરોપો છે જે હજુ સુધી કોર્ટમાં સાબિત થયા નથી, અને અમે તેમને આ બાબતોના ઉકેલમાં સફળતાની શુભેચ્છા પાઠવીએ છીએ. જોકે, વાનુઆતુ ના નાગરિક તરીકે તેમને આ આરોપોનો સામનો કરવો પડશે નહીં.તેમણે કહ્યું કે અમારા રોકાણ કાર્યક્રમ દ્વારા અમે વિશ્વના વિવિધ ભાગોમાં ચાલી રહેલા ઉથલપાથલને કારણે વાનુઆતુ માં પોતાનું ઘર બનાવતા લોકોની સંખ્યા વધારી છે, અને અમે તેમનું હૃદયપૂર્વક સ્વાગત કરીએ છીએ. પ્રધાનમંત્રીએ સ્પષ્ટતા કરી કે વાનુઆતુ નો રોકાણ દ્વારા નાગરિકતા કાર્યક્રમ કાયદેસર ઇરાદા ધરાવતા અરજદારોનું સ્વાગત કરવાનું ચાલુ રાખશે.