દ્વારકા શહેરની મધ્યમાં એક અવાવરૂ જગ્યામાંથી શનિવારે સાંજે આશરે ત્રણ-ચાર માસની બાળકી બિનવારસુ હાલતમાં મળી આવતા પોલીસે તેનો કબજો મેળવી, જરૂરી કાર્યવાહી કરી હતી.

પોલીસ સૂત્રોમાં જાહેર કરવામાં આવેલી વિગત મુજબ દ્વારકામાં હાથી ગેઈટથી ખોડીયાર ચેકપોસ્ટ વચ્ચેની અવાવરૂ જગ્યામાં એક બાળક પડ્યું હોવા અંગેની જાણ એસ.આર.ડી.ના જવાન દેવાભાઈ વાઘેલા દ્વારા પોલીસને કરવામાં આવી હતી. આથી પોલીસે ઘટના સ્થળે દોડી જઈને બાળકીનો કબજો મેળવી, તેણીની હોસ્પિટલમાં ખસેડી હતી.

સ્વસ્થ જણાતી આશરે 3 થી 4 માસની આ બાળકીને તેણીના માતા-પિતા અથવા કોઈ સંભાળ રાખનાર વ્યક્તિ દ્વારા કોઈપણ કારણોસર અવાવરૂ એવી બાવળની ઝાળીમાં ત્યજી દેતા આ અંગે દ્વારકા પોલીસ મથકમાં ગુનો નોંધાયો છે. જે અંગે આગળની તપાસ પી.એસ.આઈ. એ.બી. જાડેજા દ્વારા હાથ ધરવામાં આવી છે.