ગુજરાતીઓ માટે સૌથી મોટા ચિંતાના સમાચાર સામે આવ્યા છે. ચીનના HMPV વાયરસનો ગુજરાતમાં પ્રથમ કેસ નોંધાયો છે. અમદાવાદમાં 2 મહિનાના બાળકનો રિપોર્ટ પોઝિટિવ આવતા તેને ખાનગી હોસ્પિટલમાં સારવાર આપવામાં આવી રહી છે. અગાઉ કર્ણાટકમાં 3 અને 8 મહિનાના બે બાળકો સંક્રમિત થયા હતા. હવે ગુજરાતમાં પહેલો કેસ નોંધાતા આરોગ્ય વિભાગ સાબદુ થયું છે અને અધિકારીઓમાં દોડધામ વધી ગઈ છે. 

ભારતમાં અત્યાર સુધીમાં ત્રણ કેસ નોંધાયા છે. જેમાં એક કેસ અમદાવાદમાં અને બે કેસ કર્ણાટકમાં જોવા મળ્યા છે. સંક્રમિતોમાં અમદાવાદમાં એક 2 મહિનાનું બાળક, કર્ણાચકમાં 8 મહિનાનું બાળક અને 3 મહિનાની બાળકીનો સમાવેશ થાય છે.

ગુજરાત સરકાર એલર્ટ ​​​​​​​

આરોગ્ય વિભાગનું કહેવું છે કે અમે અમારી લેબમાં તેનું પરીક્ષણ કર્યું નથી. ખાનગી હોસ્પિટલમાં આ કેસનો રિપોર્ટ આવ્યો છે. ખાનગી હોસ્પિટલના આ રિપોર્ટ પર શંકા કરવાનું કોઈ કારણ જણાતું નથી.
ગુજરાત સરકારના આરોગ્ય વિભાગે HMPV વાઇરસને લઈ ખાસ માર્ગદર્શિકા બહાર પાડી જેમાં જરૂરી સૂચનો પણ આપ્યા છે, આરોગ્ય વિભાગના નિષ્ણાંતોનું કહેવું છે કે, HMPV અન્ય શ્વસન જેવો વાયરસ છે અને હાલમાં ગુજરાતમાં તેનો એક કેસ નોંધાયો છે, બાળકો અને વૃદ્ધોએ સૌથી વધારે સચેત રહેવાની જરૂર છે. સામાન્ય શરદી અને ફ્લૂ જેવા લક્ષણો આ વાયરસમાં જોવા મળે છે. સાથે સાથે આવશ્યક ન હોય તો આંખ-નાક-કાનનો સ્પર્શ ન કરવો જોઈએ, તેમજ શરદી-ઉધરસ હોય તો જાહેર સ્થળોએ જવાનું ટાળવું જોઈએ અને પ્રબળ રોગ પ્રતિરોધક શક્તિ માટે પૂરતી ઊંઘ લેવી જોઈએ. તેમજ વધુ પાણી પીવું અને પૌષ્ટિક ખોરાક ખાવો જોઈએ અને ચેપગ્રસ્ત વ્યક્તિની ચીજવસ્તુઓના સંપર્કમાં આવવું ના જોઈએ તેવી સલાહ આપવામાં આવી છે

કર્ણાટકમાં વાયરસથી સંક્રમિત બે બાળકોની સ્થિતિ
3 મહિનાની બાળકીને બેંગલુરુની બેપ્ટિસ્ટ હોસ્પિટલમાં દાખલ કરવામાં આવી છે, તેણીને બ્રોન્કોપ્યુનિમોનિયાને કારણે દાખલ કરવામાં આવી હતી. બાદમાં તેણીને HMPV માટે સારવાર આપવામાં આવી હતી અને હવે તેને રજા આપી દેવામાં આવી છે. બીજો કેસ 8 મહિનાના બાળકમાં જોવા મળ્યો હતો, જેને 3 જાન્યુઆરીના રોજ બ્રોન્કોપ્યુનિમોનિયાના કારણે બેંગલુરુની બેપ્ટિસ્ટ હોસ્પિટલમાં દાખલ કરવામાં આવ્યો હતો અને તેની HMPVની સારવાર ચાલી રહી છે અને હવે તેની તબિયતમાં પહેલાં કરતા સુધારો છે. આશ્ચર્યની વાત એ છે કે આરોગ્ય મંત્રાલયના જણાવ્યા અનુસાર, બંને બાળકો અન્ય કોઈ દેશમાંથી પાછા ફર્યા નથી.

આ રીતે HMPV વાઇરસ ફેલાય છે

• HMPV વાઇરસ સામાન્ય રીતે ખાંસી અને છીંક દ્વારા ફેલાય છે.
• આ ઉપરાંત, આ વાઇરસથી સંક્રમિત વ્યક્તિને સ્પર્શ કરવાથી અથવા હાથ મિલાવાથી પણ તે ઝડપથી ફેલાય છે.
• ચેપ લાગ્યાના 5 દિવસની અંદર તેનાં લક્ષણો દેખાવા લાગે છે. નિષ્ણાતો કહે છે કે આ વાઇરસ હંમેશાં હાજર હોય છે, પરંતુ તે ઠંડા હવામાનમાં વધુ સક્રિય બને છે. લોકોમાં તે ઝડપી ફેલાય છે.
• ઘરની બહાર નીકળતા પહેલાં માસ્ક પહેરો, કારણ કે તે ઉધરસ અને શરદી દ્વારા એક વ્યક્તિથી બીજામાં ફેલાય છે.
• સંક્રમિત વ્યક્તિ સાથે હાથ મિલાવશો નહીં અને ઘરે આવ્યા પછી હાથને સારી રીતે સાફ કરો.
• ડૉક્ટરની સલાહ લીધા વિના કોઈપણ દવા ન લો.
• ભીડવાળી જગ્યાએ જવાનું ટાળો, કારણ કે અહીં ચેપ ઝડપથી ફેલાય છે

આ વાયરસના લક્ષણો શું છે?
આ વાયરસને હ્યુમન મેટાપ્યુમો વાયરસ અથવા HMPV વાયરસ કહેવામાં આવે છે, જેના લક્ષણો સામાન્ય શરદી-ખાંસી જેવા જ હોય​છે. સામાન્ય કિસ્સાઓમાં તે ઉધરસ અથવા ગળામાં ખરાશ, વહેતી નાક અથવા ગળામાં દુખાવાનું કારણ બને છે. નાના બાળકો અને વૃદ્ધોમાં HMPV ચેપ ગંભીર હોય શકે છે. આ વાયરસ નબળી રોગપ્રતિકારક શક્તિ ધરાવતા લોકોમાં ગંભીર બીમારીનું કારણ બની શકે છે.