જામનગર રાજકોટ હાઇવે રોડ ફલ્લા નજીક રસ્તો ઓળંગી રહેલા ૧૩ વર્ષના બાળક ઉપરથી ટેન્કરના તોતિંગ વ્હીલ ફરી વળતાં તેની માતાની નજર સમક્ષ જ કરૂણ મૃત્યુ નિપજ્યું છે.
જામનગર તાલુકાના ફલ્લા ગામમાં રહેતા મોતીબેન બાબુભાઈ બાંભવા નામના ભરવાડ મહિલા પોતાના ૧૩ વર્ષના પુત્ર રમેશ બાબુભાઈ બાંભવાને લઈને વાડીએથી ઘર તરફ જઈ રહ્યા હતા, જે દરમિયાન ફલ્લા ગામના પાટીયા પાસે પુત્ર રમેશ રસ્તો ક્રોસ કરવા જતાં સામેથી આવી રહેલા જીજે૧૦ટી.એક્સ-૩૬૩૦ નંબરના ટેન્કરના ચાલકે બાળકને હડફેટમાં લઈ લેતાં તેની માતાની નજર સમક્ષ જ કમ કમાટી ભર્યું મૃત્યુ નીપજ્યું હતું, અને ભારે બિહામણા દ્રશ્યો સર્જાયા હતા.
આ અકસ્માતના બનાવ અંગે મૃતકના કાકા બકાભાઇ જહાભાઈ બાંભવાએ પંચ કોશી એ. ડિવિઝન પોલીસ મથક માં જાણ કરતાં પોલીસ ટુકડી ઘટના સ્થળે દોડી આવી હતી, અને બાળકના મૃતદેહનો કબજો સંભાળ્યો હતો, જ્યારે ટેન્કર ચાલક સામે ગુનો નોંધીને તપાસ આગળ ધપાવી છે.