સ્વિસ બેંક યુબીએસ દ્વારા પ્રકાશિત ગ્લોબલ વેલ્થ રિપોર્ટ 2026 મુજબ, ભારતે 2025માં 31,033 નવા યુએસ ડોલર કરોડપતિઓ બનાવ્યા, જે ચીનના 14,079 કરતા બમણા છે. જ્યારે ભારતના કરોડપતિઓની વસ્તી વાર્ષિક 3.4 ટકાના દરે વધી હતી, ત્યારે ચીનનો વિકાસ દર માત્ર 0.3 ટકા હતો.

5.3 મિલિયન કરોડપતિઓના કુલ આધાર સાથે ચીન હજુ પણ ભારતના આશરે 94.4 મિલિયન કરોડપતિઓ કરતા ઘણું આગળ છે, પરંતુ ભારત સંપત્તિ નિર્માણની ગતિના સંદર્ભમાં ડ્રેગનને પાછળ છોડી ગયું છે. માહિતી અનુસાર, 2020થી ભારતની 'સરેરાશ સંપત્તિ'માં 20 ટકાનો નોંધપાત્ર ઉછાળો જોવા મળ્યો છે. 2025ના વર્ષના આંકડા મુજબ, યુએસએમાં 4,41,078, યુકેમાં 43,139, ફ્રાન્સમાં 34,604, સ્પેનમાં 32,707, જાપાનમાં 31,428, ભારતમાં 31,033 અને ચીનમાં 14,079 કરોડપતિઓ નોંધાયા છે.

રોકાણ પસંદગીઓ અલગ અલગ હોય છે. જેમાં ભારતીયો તેમની સંપત્તિનો ૭૪.૨ ટકા ભાગ જમીન અથવા સોનામાં ધરાવે છે. અમેરિકનો શેર, મ્યુચ્યુઅલ ફંડ વગેરેમાં ૭૮.૯ ટકા હિસ્સો ધરાવે છે. જાપાની શ્રીમંત વ્યક્તિઓએ તેમની સંપત્તિનો ૬૮.૯ ટકા નાણાકીય સંપત્તિમાં રોકાણ કર્યું છે. ચીની શ્રીમંત વ્યક્તિઓ તેમની સંપત્તિનો ૫૧.૯ ટકા નાણાકીય બજારોમાં ધરાવે છે.

આરબીઆઇ સાથે જોડાયેલા એક ઘરગથ્થુ નાણાકીય અભ્યાસ મુજબ, સરેરાશ ભારતીય પરિવાર તેની સંપત્તિનો 77 ટકા રિયલ એસ્ટેટમાં, 11 ટકા સોનામાં, સાત ટકા ટકાઉ માલમાં અને માત્ર પાંચ ટકા શેર, મ્યુચ્યુઅલ ફંડ વગેરેમાં ધરાવે છે. વર્લ્ડ ગોલ્ડ કાઉન્સિલ અનુસાર, ભારતીય પરિવારો પાસે આશરે 25,000 ટન સોનું છે, જેનો ઉપયોગ રોકાણ હેતુઓ તેમજ લગ્નો, કટોકટી સુરક્ષા અને મોંઘવારી સુરક્ષા માટે થાય છે.

ભારતમાં, વૈભવી વિસ્તારોમાં જમીન અને મોટી માત્રામાં સોનું ફક્ત રોકાણ જ નહીં પરંતુ સામાજિક દરજ્જાના પ્રતીકો છે. ઘણા લોકો માટે ધનવાન દેખાવું એ ધનવાન હોવું જેટલું જ મહત્વપૂર્ણ છે. ભારતીય પરિવારોના દેવાનો બોજ તેમની કુલ સંપત્તિના માત્ર 8.2 ટકા છે, જે ચીન (10.6 ટકા) અને યુનાઇટેડ સ્ટેટ્સ (10.9 ટકા) કરતા ઓછો છે. ભારતીયો દેવાની જાળમાં ફસાયેલા નથી, જે સારી વાત છે.

આ અહેવાલમાં ભારતનો વેલ્થ ગિની ઇન્ડેક્સ 0.74 આપવામાં આવ્યો છે. અહીં ઝીરો સંપૂર્ણ સમાનતા દર્શાવે છે અને એક ભારે અસમાનતા દર્શાવે છે. આ આંકડો ચીન (0.60) કરતા નોંધપાત્ર રીતે વધારે છે અને યુનાઇટેડ સ્ટેટ્સ (0.77)ની નજીક છે, જે દેશમાં અમીર અને ગરીબ વચ્ચેના વધતા જતા અંતરને દર્શાવે છે.  યુબીએસના મુખ્ય અર્થશાસ્ત્રી પોલ ડોનોવન જણાવે છે કે, ભારત સહિત ઘણા લોકો પોતાની સંપત્તિને બીજાઓની સરખામણીમાં માપે છે. આ જ કારણ છે કે લોકો ધનવાન હોવા છતાં પણ તેઓ ખરેખર ધનવાન લાગતા નથી.