અમેરિકા, ઇઝરાયલ અને ઇરાન વચ્ચે ચાલી રહેલા યુદ્ધને કારણે ઇરાને દુનિયાનો સૌથી મહત્વનો હોર્મુઝ રૂટ બંધ કરી દીધો છે. જેના કારણે ભારતીય ધ્વજવાળા 37 જહાજો અને તેમાં સવાર 1,109 ભારતીય નાવિકો હાલમાં ફારસની ખાડી અને ઓમાનની ખાડીમાં ફસાયેલા છે.

યુદ્ધને કારણે પશ્ચિમ એશિયાના 8 દેશોએ એરસ્પેસ સંપૂર્ણપણે બંધ કરી દીધા છે. 28 ફેબ્રુઆરીએ યુદ્ધ શરૂ થયા પછી અત્યાર સુધીમાં ભારતીય એરલાઇન્સે 1,117 આંતરરાષ્ટ્રીય ફ્લાઇટ્સ રદ કરી છે. જેના કારણે હજારો મુસાફરો એરપોર્ટ પર ફસાયા છે. જેદ્દાહથી 200 મુસાફરો અમદાવાદ આવ્યા છે. 

ખાનગી એરલાઇન સ્પાઇસજેટે ખાડી દેશોમાં ફસાયેલા ભારતીય નાગરિકોને સુરક્ષિત રીતે પરત લાવવા માટે પોતાના પ્રયાસો ઝડપી બનાવ્યા છે. કંપનીએ જાહેરાત કરી છે કે તે આજે, 4 માર્ચે સંયુક્ત આરબ અમીરાત (UAE) થી આઠ ખાસ ફ્લાઇટ્સનું સંચાલન કરશે.

મુખ્ય શહેરો માટે ફ્લાઇટ્સ

યુએસ, ઇઝરાયલ અને ઈરાન વચ્ચે વધતા સંઘર્ષને કારણે પશ્ચિમ એશિયામાં એરસ્પેસ બંધ થવાથી ફ્લાઇટ કામગીરી ખોરવાઈ છે. આ આઠ ખાસ ફ્લાઇટ્સ ફુજૈરાહ, યુએઈથી ભારતના વિવિધ મુખ્ય શહેરો માટે સેવા આપી રહી છે.  અગાઉ, એરલાઇન્સે 3 માર્ચે ચાર ખાસ ફ્લાઇટ્સનું સંચાલન કર્યું હતું. સ્પાઇસજેટ 4 માર્ચથી તેની સુનિશ્ચિત ફુજૈરાહ-દિલ્હી અને ફુજૈરાહ-મુંબઈ ફ્લાઇટ્સ ફરી શરૂ કરશે.​​​​​​​

કુવૈતમાં 300 ભારતીય નાગરિકો ફસાયેલા

લગભગ 300 ભારતીય નાગરિકો હાલમાં કુવૈતમાં ફસાયેલા છે. તેઓ હાલમાં કુવૈતની ક્રાઉન પ્લાઝા હોટેલમાં રોકાઈ રહ્યા છે, પરંતુ ત્યાં પરિસ્થિતિ વધુને વધુ ગંભીર બની રહી છે. ફસાયેલા રહેવાસી કલ્પેશ સંજય રાઠી કહે છે કે ન તો હોટેલ મેનેજમેન્ટ તેમને મદદ કરી રહ્યું છે, ન તો તેમને કુવૈત સરકાર તરફથી કોઈ નક્કર ખાતરી મળી રહી છે. આ 300 નાગરિકોમાંથી મોટાભાગના મહારાષ્ટ્રના છે. આ મુસાફરો કામ કે પરિવહન માટે ત્યાં પહોંચ્યા હતા. હોટેલમાં ફસાયેલા ભારતીયોએ ભારત સરકાર અને કુવૈતમાં ભારતીય દૂતાવાસ પાસેથી તાત્કાલિક હસ્તક્ષેપની માંગ કરી છે.