રાજકોટ શહેરમાં કોરોનાએ તેજ રફતાર પકડી છે અને દરરોજ અલગ અલગ વિસ્તારોમાંથી નવા કેસ મળવા લાગ્યા છે દરમિયાન આજે સવારે વધુ આઠ કેસ મળતા મહાપાલિકાની આરોગ્ય શાખામાં દોડધામ મચી ગઈ હતી. આજના નવા આઠ કેસ સાથે રાજકોટ શહેરમાં કોરોનાના કુલ એક્ટિવ કેસની સંખ્યા ૨૩એ પહોંચી છે. હાલમાં કોરોનાના કેસ મળી રહ્યા છે તે તમામ દર્દીઓ વેક્સિનેટેડ છે તેમજ આજે મળેલા આઠ કેસ માંથી છ દર્દીની તો કોઈ જ ટ્રાવેલ હિસ્ટ્રી પણ નથી તેમ છતાં સંક્રમિત થયા છે ત્યારે એવો સવાલ ઉઠી રહ્યો છે કે શું લોકલ ટ્રાન્સમિશન તો શરૂ થયું નથી ને ?

વિશેષમાં મહાપાલિકાની આરોગ્ય શાખાના સૂત્રોમાંથી પ્રાપ્ત વિગતો મુજબ, આજે આઠ કેસ મળ્યા છે જે નીચે મુજબ છે 

1. વોર્ડ નં.૧૨ના મવડી વિસ્તારમાં ૨૭ વર્ષીય યુવાન 
2. વોર્ડ નં.૮માં રયા રોડ ઉપરના અંબિકા પાર્ક વિસ્તારમાં ૬૮ વર્ષીય સ્ત્રી 
3. વોર્ડ નં.૧૮ કોઠારીયા વિસ્તારમાં આવેલી સરદાર ટાઉનશીપમાં ૨૮ વર્ષીય પુરુષ 
4. વોર્ડ નં.૮માં લક્ષ્મીનગર વિસ્તારમાં ૩૩ વર્ષીય યુવાન 
5. વોર્ડ નં.૧૭માં કોઠારીયા રોડ ઉપર ૩૫ વર્ષીય યુવાન 
6. વોર્ડ નં.૭માં વિરાણી ચોકમાં ૨૨ વર્ષીય યુવતી 
7. વોર્ડ નં.૭માં ૨૧ વર્ષીય યુવાન તેમજ 
8. વોર્ડ નં.૧માં ગાંધીગ્રામ નજીકના જીવંતિકા નગર વિસ્તારમાં ૩૧ વર્ષીય યુવાન 

તમામની તબિયત સ્થિર હોવાનું જાણવા મળે છે

અત્રે ઉલ્લેખનીય છે કે રાજકોટમાં તા.૧૯-૫-૨૦૨૫ના રોજ કોરોનાનો પ્રથમ કેસ મળ્યો હતો. ત્યારબાદ લગાતાર કેસ મળી રહ્યા છે. હાલ સુધીમાં ફક્ત એક દર્દી સાજા થયા છે અને આજની સ્થિતિએ કુલ ૨૩ દર્દીઓ હોમ આઇસોલેશન હેઠળ સારવારમાં છે અને તમામની તબિયત સ્થિર હોવાનું જાણવા મળે છે.