કેટલાંક સમયથી ગોંડલને રેઢુપડ માની તસકરો વિવિધ વિસ્તારોમાં તસકરી કરી રહ્યાની બુમ ઉઠવા પામી છે.
નવા માર્કેટ યાર્ડની પાછળ આવેલ શિવમ રેસીડેન્સીમાં તસકરોએ પાંચ મકાનમાં તસકરી તરખાટ મચાવ્યો છે. બે મકાનમાં તસકરોને દલ્લો હાથ લાગ્યો હતો. બાકીના ત્રણ મકાનમાં કોઇ વસ્તુ હાથ નહીં લાગતા સામાન વેરવીખેર કરી તસકરો નાશી છુટયા હતાં. બનાવ અંગે પોલીસને જાણ કરતા પોલીસે તપાસ હાથ ધરી છે.
પ્રા વિગત મુજબ ગતરાત્રીનાં શિવમ રેસીડેન્સીમાં આવેલ બ્લોક નં.૧૪૦, ૧૪૫, ૨૪૦, ૨૪૫ ઉ૫રાંત અન્ય એક બ્લોકમાં તસકરો ત્રાટકયા હતાં. જેમાં દર્શનગિરિના મકાનમાંથી અંદાજે રૂા.૧૨,૦૦૦ રોકડા અને સોનાના દાગીનાની ચોરી થઇ છે. મોહીતભાઇના મકાનમાંથી પણ રોકડ તથા સોનાનાં દાગીનાની ચોરી થઇ છે. જયારે અન્ય મકાનમાં તસકરોના ફોગટનો ફેરો સાબિત થયો હોય કઇં નહીં મળતા સામાન વેરવિખેર કરી તસકરો નાસી છુટયા હતાં. જોકે ચોરીની ઘટના અંગે હજુ સુધી પોલીસ ફરિયાદ થઇ નથી. આ રેસીડેન્સીમાં અગાઉ એકજ રાતમાં પંદર મકાનોમાં ચોરીની ઘટના બની હતી.
હજુ મહીના પહેલા અડીને આવેલી શ્રીજી સોસાયટીમાં પણ પાંચ મકાનમાં ચોરી થઇ હતી. આ વિસ્તારમાં અવારનવાર તસકરો ત્રાટકી મકાનોને નિશાન બનાવતા હોય લત્તાવાસીઓએ સઘન રાત્રી પેટ્રોલિંગની માગ કરી પોલીસ તંત્રની ઢીલી નીતિ સામે રોષ વ્યકત કર્યેા છે