ગુજરાતનો સંવેદનશીલ ગણાતો કચ્છનો દરિયાકિનારો ફરી એકવાર ચર્ચામાં આવ્યો છે. છેલ્લા કેટલાક સમયથી અહીં બિનવારસી હાલતમાં માદક પદાર્થોના પેકેટો મળી આવવાની ઘટનાઓ સતત વધી રહી છે. બીએસએફ (BSF) અને સ્થાનિક પોલીસ દ્વારા હાથ ધરવામાં આવેલા સંયુક્ત સર્ચ ઓપરેશન દરમિયાન વિવિધ ટાપુઓ અને દરિયાઈ વિસ્તારોમાંથી મોટી માત્રામાં ડ્રગ્સના પેકેટો ઝડપાયા છે.

ક્યાંથી કેટલા પેકેટ મળ્યા?

સુરક્ષા એજન્સીઓના જણાવ્યા અનુસાર, પેટ્રોલિંગ દરમિયાન અલગ-અલગ લોકેશન પરથી નીચે મુજબના જથ્થા મળી આવ્યા છે

ખિદરત ટાપુ: સર્ચ દરમિયાન અહીંથી સૌથી વધુ 10 પેકેટ મળી આવ્યા છે.

સુગર બેટ: આ વિસ્તારમાંથી પણ 10 પેકેટ જપ્ત કરવામાં આવ્યા છે.

કુંડી બેટ: પેટ્રોલિંગ દરમિયાન અહીંથી વધુ 10 પેકેટ મળી આવ્યા છે.

મોટા પીરબેટ: દરિયાઈ પટ્ટી પરથી 7 પેકેટ સુરક્ષા દળોના હાથે લાગ્યા છે.

માંડવી (પાંચોટિયા): માંડવીના પાંચોટિયા દરિયાકિનારા નજીકથી પણ 7 પેકેટ મળી આવ્યા છે.

સુરક્ષા એજન્સીઓ સતર્ક

એકસાથે આટલી મોટી સંખ્યામાં બિનવારસી પેકેટો મળતા સુરક્ષા એજન્સીઓ અને ગુપ્તચર વિભાગ દોડતું થયું છે. પ્રાથમિક તપાસમાં આ પેકેટોમાં ચરસ અથવા હેરોઈન જેવો માદક પદાર્થ હોવાની આશંકા સેવાઈ રહી છે. આ જથ્થો ક્યાંથી આવ્યો અને કોના દ્વારા મોકલવામાં આવ્યો છે, તે દિશામાં એફએસએલ (FSL) ની મદદથી તપાસ તેજ કરવામાં આવી છે.

મહત્વની નોંધ: દરિયામાં ભરતી અને ઓટના કારણે આ પેકેટો પાકિસ્તાન સરહદ તરફથી તણાઈને ભારતીય સીમામાં આવ્યા હોવાની પ્રબળ શક્યતા છે.

સર્ચ ઓપરેશન તેજ કરાયું

આ ઘટના બાદ બીએસએફ, કોસ્ટ ગાર્ડ અને સ્થાનિક પોલીસ દ્વારા સમગ્ર ક્રીક વિસ્તાર અને ટાપુઓ પર સઘન સર્ચ ઓપરેશન શરૂ કરવામાં આવ્યું છે. ડ્રગ્સ માફિયાઓ દ્વારા સમુદ્ર માર્ગનો ઉપયોગ કરીને ભારતમાં નશીલા પદાર્થો ઘુસાડવાના પેંતરાને નિષ્ફળ બનાવવા માટે તમામ એજન્સીઓ હાઈ એલર્ટ પર છે. આગામી દિવસોમાં વધુ પેકેટો મળે તેવી પણ સંભાવના છે.