૧૯૬ બોટલ, મોબાઇલ અને સ્વીફટ કાર મળી ૪.૧૭ લાખનો મુદામાલ કબ્જે : શહેરના મારવાડીવાસમાં દેશી દારુ અંગે દરોડા

કાલાવડના મકાજી મેઘપર નદીના પુલ પર સ્વીફટ ડીઝાયર કારને આંતરીને પોલીસે તલાશી લેતા તેમાથી ૧૯૬ બોટલ વિદેશી દારુની તથા ૪ મોબાઇલ મળી કુલ ૪.૧૭ લાખના મુદામાલ સાથે ૩ શખ્સોને પકડી લીધા હતા. ઉપરાંત જામનગરના રણજીતસાગર રોડ પર ૩ સ્થળે દેશી દારુ અંગે દરોડા પાડવામાં આવ્યા હતા.
કાલાવડ ગ્રામ્ય પોલીસ ગઇકાલે પેટ્રોલીંગમાં હતી ત્યારે મકાજી મેઘપર નદીના પુલ પર સ્વીફટ ડીઝાયર ગાડી નં. જીજે૧કેઇ-૮૧૭૧ને આંતરીને તલાશી લેતા તેમાથી મેકડોવેલ્સ નંબર ૧ની ૫૨ બોટલ તથા રોયલ સ્ટેગ સુપરીયર વ્હીસ્કીની ૧૪૪ બોટલ મળી આવી હતી.
પોલીસે દારુની હેરફેરમાં ઉપયોગ લીધેલી કાર, ૪ મોબાઇલ, ઇંગ્લીશ દારુની બોટલો મળી કુલ ૪.૧૭.૫૦૦નો મુદામાલ કબ્જે કરી બોટાદ જીલ્લાના તુરખા ગામના કાળુ ઉર્ફે કાળીયો જાદવ બાવળીયા, કુરખા ગામના છત્રપાલ ઉર્ફે સતુભા સુરેશ બશીયા અને મકાજી મેઘપર ગામના હરજી ધનજી ગમારા ત્રણેયને દબોચી લીધા હતા.
આ ઉપરાંત જામનગરના રણજીતસાગર રોડ મારવાડીવાસના ઢાળીયા પાસે રહેતી જમનાબેન રમેશ બુઘ્ધભટ્ટીને ત્યાથી ૨૦ લીટર આથો, ૨ લીટર દારુ અને ભઠ્ઠીના સાધનો તથા ડાઇબેન નાનજી ભાટીને ત્યાથી ૨૦ લીટર આથો, ૨ લીટર દારુ અને ભઠ્ઠીના સાધનો ઉપરાંત રામીબેન પ્રેમજી ભાટીને ત્યાથી ૨ લીટર દેશી દારુ, ભઠ્ઠીના સાધનો અને ૨૦ લીટર કાચો આથો મળી આવ્યો હતો.