કુવાડવા રોડ પોલીસ મથકના સ્ટાફને નવાગામ આણંદપર પાસે રૂડા ટ્રાન્સપોર્ટનગરમાં વંડામાંથી રૂપિયા 1.01 લાખની કિંમતનો 25 પેટી દારૂનો જથ્થો ઝડપી લીધો હતો. દારૂનો આ જથ્થો અહીં મૂકી જનાર શખસને ઝડપી લેવા પોલીસે તપાસ હાથ ધરી છે.

દારૂના આ દરોડાની જાણવા મળતી વિગતો મુજબ, કુવાડવા રોડ પોલીસ મથકના એએસઆઈ કે.વી. જાડેજાની રાહબરી હેઠળ હેડ કોન્સ્ટેબલ હિતેશભાઈ માલકીયા, કોન્સ્ટેબલ મેહુલભાઈ મુંધવા સહિતનો સ્ટાફ નાઈટ પેટ્રોલિંગમાં હતો. દરમિયાન એવી બાતમી મળી હતી કે, રૂડા ટ્રાન્સપોર્ટનગરમાં કોકોકોલાના ફ્રીજના ગોડાઉન પાસે ખાલી પ્લોટમાં વિદેશી દારૂનો જથ્થો રાખવામાં આવ્યો છે.

આ બાતમીના આધારે પોલીસની ટીમે અહીં કોકોકોલાના ફ્રીજના ગોડાઉન પાસે આવેલા એક ખાલી વંડામાં તપાસ કરતા ખૂણામાં કપડું ઢાંકેલું હોય જે કપડું ઊંચકાવી જોતા તેની અંદરથી દારૂનો જથ્થો મળી આવ્યો હતો. પોલીસે અહીંથી ઇંગ્લિશ દારૂની અલગ અલગ બ્રાન્ડની 25 પેટી કિંમત રૂ 1,01,376 નો દારૂનો જથ્થો કબજે કર્યો હતો. દારૂનો આ જથ્થો અહીં ઉતારનાર શખસને ઝડપી લેવા માટે પોલીસે તપાસ હાથ ધરી છે.