બે દરોડામાં ૨૧ હજારની રોકડ અને પત્તા કબ્જે

જામનગર નજીક શાપર ગામમાં આવેલા તિનબતી વિસ્તારમાં જાહેરમાં તિનપતીનો જુગાર રમતા ૪ શખ્સોને ૧૧ હજારની મત્તા સાથે પકડી લેવામાં આવ્યા હતા, જયારે ધ્રોલના સોયલ ગામે પાના ટીંચતા ૭ શખ્સો ૧૦ હજારની મત્તા સાથે પકડાયા હતા.
એસ.પી. પ્રેમસુખ ડેલુ, ગ્રામ્ય ડીવાયએસપી ડી.પી. વાઘેલાના માર્ગદર્શન હેઠળ સિકકા પીએસઆઇ આર.એચ.બાર અને સ્ટાફ દારુ, જુગારના કેશો શોધી કાઢવા પેટ્રોલીંગમાં હતા, દરમ્યાન સ્ટાફના હેડ કોન્સ. જીતેન્દ્રસિંહ જાડેજા, અર્જુનસિંહ જાડેજા તથા દિલીપસિંહ જાડેજાને ખાનગી રાહે બાતમી મળેલ કે, શાપર ગામ, ત્રણબત્તી વિસ્તાર બાવળની ઝાળીમાં કેટલાક શખ્સો ગંજીપતા વડે જુગાર રમે છે.
જેના આધારે દરોડો પાડી તિનપત્તીનો જુગાર રમતા શાપર ગામના મનિષ ચંપકલાલ રાવલ, ગૌતમ પેથા ભાંભી, જેન્તી ઉર્ફે જેનો છગન ગામી અને લલીત ઉર્ફે દિપક અંબાબાલ હિંશુ નામના શખ્સોને રોકડા ૧૧૨૨૦ અને ગંજીપતા સાથે દબોચી લીધા હતા.
બીજા દરોડામાં ધ્રોલના સોયલ ગામે શેરીમાં તિનપતીનો જુગાર રમતા સોયલના અલારખા આદમ મકવાણા, ધ્રાંગડા ગામના ઇકબાલ સુમાર જખરા, સોયલના અબ્દુલ કારા પઠાણ, સોમા આંબા ચાવડીયા, કિશોર અમરશી ચાવડા, રમેશ રુડા ચાવડા અને ઇસ્માઇલ દાઉદ મકવાણા નામના શખ્સોને રેઇડ દરમ્યાન સ્થાનીક પોલીસે પકડી પાડી ૧૦૬૫૦ અને ગંજીપતા જપ્ત કરી કાયદેસરની કાર્યવાહી કરી હતી.