૧૨માં આંતરરાષ્ટ્રીય વિશ્વ યોગ દિવસ નિમિત્તે સમગ્ર દેશ અને દુનિયામાં યોગમય માહોલ જોવા મળી રહ્યો છે, ત્યારે રંગીલા રાજકોટમાં યોગ દિવસની સાવ અનોખી અને વિશિષ્ટ પ્રકારે ઉજવણી કરવામાં આવી છે. રાજકોટમાં મહિલાઓ અને ઉત્સાહી નાગરિકોએ પરંપરાગત રીતે જમીન પર યોગ કરવાને બદલે પાણીની અંદર 'એક્વા યોગા' કરીને સૌ કોઈને આશ્ચર્યચકિત કરી દીધા છે. આ અનોખા આયોજનમાં મોટી સંખ્યામાં લોકોએ ભાગ લઈ ઉત્સાહભેર યોગાસનો કર્યા હતા.

૧૦૭ મહિલાઓ અને અન્ય લોકોએ સ્વિમિંગ પૂલમાં કર્યા આસનો

આ ખાસ યોગ શિબિરમાં ૧૦૭ જેટલી મહિલાઓ સહિત કુલ ૧૫૭ ઉત્સાહી લોકોએ સ્વિમિંગ પૂલના પાણીની અંદર ઉતરીને અલગ-અલગ પ્રકારના કઠિન યોગાસનો અને પ્રાણાયામ ખૂબ જ સરળતાથી કર્યા હતા. આજે વિશ્વ યોગ દિવસની સાથે-સાથે 'વિશ્વ સંગીત દિવસ' પણ હોવાથી, આ આયોજનને વધુ રસપ્રદ બનાવવા માટે ખાસ 'મ્યુઝિકલ થીમ' રાખવામાં આવી હતી. સંગીતના મધુર સૂર અને તાલ સાથે પાણીની અંદર યોગ કરવાનો અનુભવ તમામ સહભાગીઓ માટે એકદમ અદ્ભુત અને યાદગાર રહ્યો હતો.

પાણીમાં યોગ કરવાથી શરીરને થાય છે અદભુત ફાયદા

એક્વા યોગામાં ભાગ લેનાર મહિલાઓએ પોતાના અનુભવો શેર કરતા જણાવ્યું હતું કે, જમીન પર યોગ કરવા કરતા પાણીની અંદર યોગ કરવાના શારીરિક અને માનસિક ફાયદા ઘણા વધારે છે. ખાસ કરીને જે લોકોને સાંધાના દુખાવા કે વજનના કારણે જમીન પર બેસીને અમુક મુવમેન્ટ્સ કે આસનો કરવામાં તકલીફ પડતી હોય, તેવા આસનો પાણીના ઉત્પ્લાવક બળના કારણે ખૂબ જ સરળતાથી અને પીડા વગર થઈ શકે છે. પાણી શરીરના વજનને હલકું કરી દે છે, જેથી ફ્લેક્સિબિલિટી વધે છે. રાજકોટવાસીઓનો આ નવતર પ્રયોગ સોશિયલ મીડિયા પર પણ ભારે પ્રશંસા પામી રહ્યો છે.