એક વૃદ્ધ મહિલાએ 105 વર્ષની ઉંમરે તેની માસ્ટર ડિગ્રી મેળવી છે. અમેરિકાની વર્જિનિયા ગિન્ની હિસ્લોપે 80 વર્ષ પછી ફરી શિક્ષણ તરફ જોયું અને સ્ટેનફોર્ડ ગ્રેજ્યુએટ સ્કૂલ ઑફ એજ્યુકેશન માંથી માસ્ટર ડિગ્રી મેળવી છે. તેમણે 1940માં સ્ટેનફોર્ડ ખાતે અભ્યાસ કર્યો હતો. ત્યારે તેણે પોતાનું કોર્સવર્ક પણ પૂર્ણ કર્યું, પરંતુ તેની છેલ્લી માસ્ટરની થીસીસ સબમિટ કરતા પહેલા જ, બીજું વિશ્વયુદ્ધ ફાટી નીકળ્યું.

યુદ્ધ ફાટી નીકળતાં, ગિન્નીના પ્રેમી, જ્યોર્જ હિસ્લોપને યુદ્ધમાં સેવા આપવા માટે બોલાવવામાં આવ્યા. આ કારણે ગિન્ની હિસ્લોપે તેની સાથે લગ્ન કરવા માટે શાળા છોડી દીધી હતી. તેણીએ આખરે યુદ્ધના પ્રયત્નોમાં મદદ કરી અને તેના પરિવારને ઉછેરવા પર ધ્યાન કેન્દ્રિત કર્યું.

બે બાળકો, ચાર પૌત્ર-પૌત્રી અને નવ પ્રપૌત્ર-પૌત્રી સહિત તેના પરિવાર સાથે જીવન પસાર કરતી વખતે, ગિન્ની હિસ્લોપે દાયકાઓ સુધી વૉશિંગ્ટન રાજ્યમાં શાળા અને કૉલેજ બોર્ડમાં પણ સેવા આપી હતી. આ બાદ હવે ગિન્ની હિસ્લોપ અંતે સ્નાતક થવા માટે શાળામાં પરત ફર્યા, રવિવાર, જૂન 16ના રોજ તેણીના માસ્ટર ઓફ આર્ટસ ઇન એજ્યુકેશનને સ્વીકારવા સ્ટેજ પર આવ્યા .

જ્યારે તેણીને ડીન ડેનિયલ શ્વાર્ટ્ઝ દ્વારા ડિપ્લોમા સોંપવામાં આવ્યો, ત્યારે ગિન્ની હિસ્લોપે કહ્યું, "હે ભગવાન, મેં આ પળ માટે દાયકાઓથી રાહ જોઈ છે." બુધવારે પ્રસારિત થયેલા એક ઇન્ટરવ્યુમાં "ગુડ મોર્નિંગ અમેરિકા" સાથે વાત કરતા, ગિન્ની હિસ્લોપે જણાવ્યું કે તે આ સિદ્ધિ હાંસલ કરવા માટે લાંબા સમયથી રાહ જોઈ રહી હતી.