હંગેરીમાં ઓર્બનની જીત ટ્રમ્પ માટે હાર, યુરોપિયન યુનિયન માટે વિજય
ટ્રમ્પના ડોબરમેન જેવા વિક્ટર ઓર્બનની હંગેરીની ચૂંટણીમાં હાર થઇ તે અમેરિકા માટે મોટો ફટકો છે. ટ્રમ્પ ઓર્બન મારફતે નાટો અને યુરોપિયન યુનિયન બન્ને ઉપર દબાણ લાવતા હતા તે હવે નહીં થઇ શકે. ખાસ કરીને યુરોપિયન યુનિયને તો ઓર્બનના પરાજયને લીધે રાહતનો શ્ર્વાસ લીધો જ હશે. યુરોપિયન રાજકારણમાં ઓર્બનની હાર એક મહત્વપૂર્ણ વળાંક તરીકે જોવામાં આવી રહી છે. ઘણા વર્ષોથી વડા પ્રધાન વિક્ટર ઓર્બન યુરોપિયન યુનિયન માટે સતત પડકાર બની રહ્યા હતા. તેઓ માત્ર પોતાના દેશની અંદર જ નહીં, પરંતુ યુરોપના સમૂહિક નિર્ણયો પર પણ અસર કરતા હતા.
ખાસ કરીને, જ્યારે યુરોપિયન યુનિયન એકમતથી નિર્ણય લેવાનો હોય, ત્યારે ઓર્બન ઘણીવાર પોતાના વીટોનો ઉપયોગ કરીને આખી પ્રક્રિયા અટકાવી દેતા. આ કારણે બ્રસેલ્સ અને બુડાપેસ્ટ વચ્ચે વિશ્ર્વાસનો અભાવ ઊભો થયો હતો. ઓર્બનની રાજનીતિનો મૂળ આધાર હંગેરીની રાષ્ટ્રીય સ્વતંત્રતા પર રહ્યો છે. તેમણે હંમેશા દલીલ કરી કે યુરોપિયન યુનિયન હંગેરીના આંતરિક મુદ્દાઓમાં વધુ હસ્તક્ષેપ કરે છે. પરંતુ યુરોપના ઘણા નેતાઓના મત મુજબ, આ માત્ર એક રાજકીય રણનીતિ હતી, જેના દ્વારા તેઓ પોતાની સ્થિતિ મજબૂત રાખતા હતા. ખાસ કરીને યુક્રેન યુદ્ધ પછી, જ્યારે યુરોપે રશિયા સામે કડક વલણ અપનાવ્યું, ત્યારે ઓર્બનનો વિરોધ વધુ સ્પષ્ટ બન્યો. તેમણે યુક્રેનને નાણાકીય મદદ અને રશિયા સામેના પ્રતિબંધો બંનેમાં અવરોધ ઊભો કર્યો.
આ પૃષ્ઠભૂમિમાં, પીટર મેગ્યારની જીત એક મોટું નીતિગત પરિવર્તન સૂચવે છે. મેગ્યારનો અભિગમ ઓર્બનથી જુદો છે. તેઓ યુરોપિયન યુનિયન અને નાટો સાથે સહકાર વધારવા માંગે છે. તેમના નિવેદનોમાં સ્પષ્ટ સંકેત છે કે તેઓ હંગેરીને ફરીથી યુરોપના મુખ્ય પ્રવાહ સાથે જોડવા ઈચ્છે છે. આ માત્ર નીતિમાં ફેરફાર નથી, પરંતુ દિશામાં પરિવર્તન છે. સૌથી મહત્વપૂર્ણ પ્રશ્ર્ન યુક્રેનને આપવાની લોનનો છે, જે લગભગ ૯૦ અબજ યુરોની છે. ઓર્બનના વિરોધને કારણે આ નિર્ણય લાંબા સમયથી અટવાયો હતો. હવે, નવી સરકાર આવતાં આ અવરોધ દૂર થઈ શકે છે. જો આવું થાય, તો યુરોપિયન યુનિયન વધુ એકજૂટ દેખાશે અને યુક્રેનને સહાયમાં ગતિ આવશે. આથી યુરોપની વૈશ્ર્વિક રાજકીય સ્થિતિ પણ મજબૂત બની શકે છે. પરંતુ આ પરિવર્તનને સંપૂર્ણ રીતે સરળ ગણવું યોગ્ય નથી. મેગ્યાર યુરોપ પ્રત્યે સહકારવાદી છે, પરંતુ તેઓ દરેક મુદ્દે બ્રસેલ્સ સાથે સહમત રહેશે એવું નથી.
ઉદાહરણ તરીકે, રશિયન ઉર્જા પરની નિર્ભરતા તોડવી એ યુરોપ માટે એક મોટી પ્રાથમિકતા છે, પરંતુ હંગેરી માટે આ તાત્કાલિક શક્ય નથી. યુરોપિયન યુનિયન સામાન્ય નીતિ તરફ આગળ વધવા માંગે છે, પરંતુ ઘણા દેશો, જેમાં હંગેરી પણ છે, પોતાની અલગ દૃષ્ટિ રાખે છે. મેગ્યાર આ મુદ્દે સંપૂર્ણ રીતે યુરોપિયન લાઇન પર નહીં ચાલે તેવી શક્યતા છે. એટલે, ઓર્બનના જતા મતભેદો પૂરેપૂરા ખતમ થઈ જશે એવું માનવું યોગ્ય નથી. ઓર્બનની હારનો એક મહત્વપૂર્ણ અર્થ એ પણ છે કે યુરોપિયન યુનિયન પોતાની અંદરનો એક સૌથી કડક વિરોધી અવાજ ગુમાવી રહ્યો છે. તેઓ ઘણીવાર યુરોપિયન નીતિઓને બ્લેકમેલ કરવા માટે વીટોનો ઉપયોગ કરતા હતા, જેમ કે યુરોપિયન ફંડ મેળવવા માટે દબાણ બનાવવું. હવે આ પ્રકારની રાજકીય શૈલીમાં ઘટાડો થઈ શકે છે. પરંતુ તેની સાથે જ, અન્ય દેશો વચ્ચેના મતભેદો વધુ ખુલ્લા પડી શકે છે, કારણ કે હવે ધ્યાન માત્ર હંગેરી પર કેન્દ્રિત નહીં રહે.
