વેર્સ્ટન ડીસ્ટબન્સની અસરને કારણે મોસમે પણ પક્ષ પલ્ટો કર્યો છે, લગભગ સવા મહીનો વ્હેલો વરસાદ આવ્યો છે, જો કે આ માવઠું છે, ત્યારે કેસર કેરીના પાક ઉપર જોખમ મંડરાયું છે, આગામી દિવસોમાં કેરીના ભાવ પણ વધશે અને અન્ય પાકોને પણ નુકશાન થવાની શકયતા છે, આજથી તા.૧૫ સુધી ત્રણ દિવસ કમોસમી વરસાદની આગાહી કરવામાં આવી છે, ગઇકાલે કપડવંજમાં કરા પડયા હતાં અને દાહોદમાં પણ ઝાપટા પડયા હતાં જયારે આવતીકાલે જામનગર જિલ્લામાં પણ વરસાદ પડે તેવી આગાહી કરવામાં આવી છે. 
હવામાન ખાતા દ્વારા આજથી વરસાદની આગાહી કરી છે, ખાસ કરીને જામનગર જિલ્લામાં વરસાદની શકયતા છે, જેના કારણે એક તો કેરીનો પાક ૪૦ ટકા ખરી ગયો છે અને ‚ા.૨૫૦ થી ૩૦૦ કિલો લેખે સારી કેરી મળે છે, જો માવઠુ થશે તો કેરીના પાકને વધુ નુકશાન થશે તેમ પણ જાણવા મળે છે, ઉપરાંત માર્કેટીંગ યાર્ડ અને તંત્ર દ્વારા આ ત્રણ દિવસમાં યાર્ડમાં માલસામાન ન લાવવા ખેડુતોને વિનંતી કરવામાં આવી છે અને જે ખેડુતોનો પાક ખુલ્લામાં રાખવામાં આવ્યો હોય તેને સલામત સ્થળે ખસેડી લેવા જણાવાયું છે. 
ગુજરાતમાં તલ, મગફળી, બાજરી, વરયાળી, ઘઉં, કેરી સહિતના પાકો તૈયાર થયા છે, જો ત્રણ દિવસમાં માવઠુ થાય તો પાકને ભારે નુકશાન થશે તેવી પણ શકયતા છે, હવામાન ખાતાએ જણાવ્યું છે કે, ૪૦ કિ.મી. સુધીનો પવન પણ ફુંકાશે અને કેટલાક ગામડાઓમાં કરા પણ પડશે. આ વખતે હાફુસ કેરી અને કેસર કેરી બજારમાં આવી છે, રત્નાગીરી કેરીનો ભાવ ‚ા.૧૪૦ થી ૧૮૦ બોલાય છે અને કેસર કેરીની ઓછી આવક છે પરંતુ સારી કેરી ‚ા.૨૩૦ થી ૨૭૦ના કિલો લેખે મળે છે, જો માવઠુ થાય તો આગામી દિવસોમા કેરી કડવી બનશે તેમ જણાય છે. 
આ વર્ષે અલગ-અલગ સ્થળોએ માવઠા થતાં ખેડુતોને માર પડયો છે અને પાકને પણ નુકશાન થયું છે, જો કે સરકારે થોડીઘણી રાહત આપી છે, પરંતુ નુકશાની પુરી શકાય તેમ નથી. આમ, ત્રિદિવસીય માવઠાની અસર ગુજરાતમાં જોવા મળશે અને જામનગર જિલ્લામાં પણ આવતીકાલે વરસાદ પડે તેવી હવામાન ખાતાએ બે દિવસ પહેલા જ આગાહી કરી દીધી છે.