રોકડ સહિતનો સામાન ચોરી કરી ગયા : વેપારીઓમાં રોષ : એક શખ્સ કેમેરામાં કેદ : ફરીયાદ માટે તજવીજ

જામનગર શહેરમાં ઘરફોડ અને વાહનચોરીના બનાવો છાસવારે બને છે, તાજેતરમાં બનેલી ચોરીના ભેદ ઉકેલી નાખવામાં આવ્યા છે ત્યા શહેરના જુના રેલ્વે સ્ટેશન પાસે આવેલી કરીયાણા સહિતની ચાર દુકાનોના છાપરા ઉચકાવીને તસ્કરો ત્રાટકયા હતા, આજે સવારે આ અંગેની જાણ થતા ફરીયાદ નોંધાવવા તજવીજ હાથ ધરવામાં આવી છે.
જામનગરના સતત ધમધમતા જુના રેલ્વે સ્ટેશન પાસે આવેલી બે કરીયાણાની દુકાન, એક અગરબત્તી અને એક ફરસાણની દુકાનોમાં નિસાચરો ત્રાટકયા હતા, જેમાં રોકડ અને પરચુરણ સામાન લઇ ગયાનું પ્રાથમિક દ્રષ્ટીએ જાણવા મળ્યું છે.
દુકાનોના છાપરા ઉંચકાવીને તસ્કરો અંદર ત્રાટકયા હતા, આજે સવારે આ અંગેની જાણ થતા વેપારીઓ દોડી આવ્યા હતા, આ માટે વિધિવત ફરીયાદ નોંધાવવા તજવીજ ચલાવવામાં આવી રહી છે, ફરીયાદમાં કુલ કેટલો મુદામાલ ચોરી થયો એ જાણવા મળશે.
અહીં લગાડેલા સીસી કેમેરા ચેક કરાતા એક શખ્સ કેદ થયો છે અને આ ફુટેજના આધારે પોલીસ દ્વારા આ દીશામાં તપાસ લંબાવવામાં આવી છે, અત્રે ઉલ્લેખનીય છે કે જુના સ્ટેશન વિસ્તારમાં ચોરીના બનાવો છાસવારે બને છે, હજુ પાંચ માસ પહેલા જ બે-ત્રણ દુકાોનોને નિશાન બનાવવામાં આવી હતી અને ફરી ચાર દુકાનોને ટાર્ગેટ કરાઇ છે. આથી આ વિસ્તારમાં પેટ્રોલીંગ વધુ સધન બનાવવાની પણ વેપારીઓમાં માંગ ઉઠી છે. ટુંકાગાળામાં ચોરીનો વધુ એક બનાવ સામે આવતા વેપારીઓમાં રોષની લાગણી ફેલાઇ ગઇ છે.