રશિયાએ યુક્રેન પર મોટો હુમલો કર્યો છે. ક્લસ્ટર વોરહેડ્સથી સજ્જ રશિયન બેલિસ્ટિક મિસાઈલે ઉત્તરી યુક્રેનના સુમી શહેરને નિશાન બનાવ્યું. આ હુમલામાં બે બાળકો સહિત 11 લોકોએ જીવ ગુમાવ્યા હતા. લગભગ 84 લોકો ઘાયલ થયા છે. પ્રાદેશિક ફરિયાદી કાર્યાલયના જણાવ્યા અનુસાર ઘાયલોમાં છ બાળકોની હાલત અત્યંત નાજુક છે.

જીવ ગુમાવનારા બે બાળકોની ઉંમર નવ અને 14 વર્ષની છે. બે શૈક્ષણિક સંસ્થાઓ સહિત કુલ 15 ઈમારતોને નુકસાન થયું હતું. રાહત અને બચાવ કાર્ય ચાલુ છે. યુક્રેનનું સુમી શહેર રશિયાથી માત્ર 40 કિમી દૂર છે. નોંધનીય છે કે યુક્રેન અને રશિયા વચ્ચેના યુદ્ધને સોમવારથી 1000 દિવસ પૂર્ણ થયા છે.

યુક્રેન રશિયાની અંદર કરશે હુમલો- અમેરિકાએ આપી મંજૂરી

આ દરમિયાન મોટા સમાચાર આવી રહ્યા છે કે યુક્રેનિયન અધિકારીઓની ભારે લોબિંગ પર યુએસ પ્રમુખ જો બાઈડને રશિયાની અંદર હુમલો કરવાની મંજૂરી આપી દીધી છે. હવે યુક્રેન રશિયા સામે અમેરિકાની લાંબા અંતરની મિસાઈલોનો ઉપયોગ કરી શકશે. એવું માનવામાં આવે છે કે ઉત્તર કોરિયાના સૈનિકોના જવાબમાં યુક્રેન આ હથિયારોનો ઉપયોગ કરી શકે છે. હકીકતમાં રશિયાના સમર્થનમાં ઉત્તર કોરિયાએ યુક્રેન સામે લડવા માટે પોતાના સૈનિકોને મોકલ્યા છે.

ઝેલેન્સકીએ કહ્યું- મિસાઇલ બધું જ કહી દેશે

બીજી તરફ, યુક્રેનના રાષ્ટ્રપતિ વોલોદિમિર ઝેલેન્સકીએ કહ્યું, "આજે મીડિયામાં ઘણું કહેવામાં આવી રહ્યું છે કે અમને સંબંધિત કાર્યવાહી માટે પરવાનગી મળી છે. પણ હુમલા શબ્દોથી થતા નથી. આવી બાબતો જાહેર કરવામાં આવતી નથી. મિસાઇલો પોતે જ બધું કહેશે." ઝેલેન્સકીએ કહ્યું કે રશિયાએ એક સાથે 120 મિસાઈલ અને 90 ડ્રોન વડે હુમલો કર્યો. આ ડ્રોનમાં ઈરાનમાં બનેલા શાહેદ ડ્રોન અને બેલેસ્ટિક અને એરક્રાફ્ટથી લોન્ચ કરાયેલી મિસાઈલોનો સમાવેશ થાય છે. યુક્રેનિયન સૈન્યનું કહેવું છે કે તેણે કુલ 144 ટાર્ગેટ પર હુમલો કર્યો છે.