નવી શિક્ષણ નીતિ અમલમાં આવ્યા પછી આજે પ્રથમ વખત સૌરાષ્ટ્ર યુનિવર્સિટી ખાતે બોર્ડ ઓફ સ્પોર્ટ્સ અને ફિઝિકલ એજ્યુકેશનની એક બેઠક મળી હતી. અંતર યુનિવર્સિટી સ્પર્ધામાં ભાગ લેવા જતા ખેલાડીઓને જો ઈજા થાય તો તેમનો સંપૂર્ણ ખર્ચ સૌરાષ્ટ્ર યુનિવર્સિટી ભોગવે તે સહિતના જુદા જુદા 30 મુદ્દાઓ પર આજની બેઠકમાં ચર્ચા કરવામાં આવી હતી.

સૌરાષ્ટ્ર યુનિવર્સિટી કેમ્પસ પર હોકી બાસ્કેટબોલ લોન ટેનિસ રાયફલ શુટીંગ જીમનેસિયમ સ્વિમિંગ પૂલ ટર્ફ વિકેટ સહિતના જુદા જુદા મેદાનો આવ્યા છે. તે ભાડે આપવા અંગેના નિયમો આજની બેઠકમાં ચર્ચામાં લેવામાં આવ્યા હતા. સૌરાષ્ટ્ર યુનિવર્સિટી સંલગ્ન કોલેજને મેદાન ભાડે આપવાના કિસ્સામાં તેમની પાસેથી ભાડે વસૂલવું કે નહીં તે મુદ્દે પણ આજની બેઠકમાં ચર્ચા કરવામાં આવી હતી.

આંતર યુનિવર્સિટી સ્પર્ધામાં જતા ખેલાડીઓ કોચ મેનેજર વગેરેને ટ્રેકસૂટ ડ્રેસ શૂઝ બેગ કેપ વગેરે આપવાની દરખાસ્ત આજની બેઠકમાં મૂકવામાં આવી હતી અને આ માટે રુ. 36.75 લાખના ખર્ચનો અંદાજ મૂકવામાં આવ્યો હતો.

વિદ્યાર્થીઓ જ્યારે સૌરાષ્ટ્ર યુનિવર્સિટી સલગન કોલેજોના પ્રથમ વર્ષમાં એડમિશન લે ત્યારે તેમની પાસેથી પ્રથમ વરષે તમામ સેમેસ્ટરની સ્પોર્ટ્સ કોમ્પ્લેક્સની ફી વસૂલવાની દરખાસ્ત પણ આજની બેઠકમાં રજૂ કરવામાં આવી હતી. યુનિવર્સિટી ની ટીમ જ્યારે બહારગામ જવાની હોય ત્યારે ટ્રેનની ટિકિટ બુક કરવાની જવાબદારી મેનેજરની હોય છે. પરંતુ જો કોઈ કિસ્સામાં મેનેજરથી ટિકિટ બુક ન થઈ શકે તો ખાનગી એજન્ટ પાસે મારફત પણ ટિકિટ બુક કરવાનું નક્કી કરાયું હતું. લોકલ અને બહારગામના ખેલાડીઓ કોચ મેનેજર વગેરેના ભથ્થામાં વધારો કરવાની દરખાસ્ત પણ આ બેઠકમાં ચર્ચામાં લેવામાં આવી હતી. આર્મી અને પોલીસ ભરતી પરીક્ષા પૂર્વે બહારના લોકો સૌરાષ્ટ્ર યુનિવર્સિટી કેમ્પસના રનિંગ ટ્રેકનો ઉપયોગ કરતા હોય છે. આવા લોકો પાસેથી દર મહિને ચોક્કસ ફી લેવાનું પણ આજની બેઠકમાં ચર્ચાયુ હતું