મુંબઈમાં જન્મેલા રેશ્મા ૧૯૮૮માં ૧૧ વર્ષની ઉંમરે અમેરિકા ગયા હતા. બાદમાં, તેમણે ત્યાં દવા અને વૈજ્ઞાનિક સંશોધનમાં કારકિર્દી બનાવી. તેમણે બોસ્ટન યુનિવર્સિટીમાં તબીબી વિજ્ઞાનનો અભ્યાસ કર્યો. આ પછી તેમને મેસેચ્યુસેટ્સ જનરલ હોસ્પિટલમાં ફેલોશિપ મળી. 2015 માં, તેમણે હાર્વર્ડ બિઝનેસ સ્કૂલમાંથી 'જનરલ મેનેજમેન્ટ' માં ડિગ્રી મેળવી.

ટાઈમ મેગેઝિન અનુસાર, રેશ્મા 2018 માં વર્ટેક્સમાં ચીફ મેડિકલ ઓફિસર તરીકે જોડાયા હતા. 2020માં, તેમને આ કંપનીના સીઈઓ બનાવવામાં આવ્યા હતા. તેમના નેતૃત્વ હેઠળ કંપનીએ મોટી સફળતા મેળવી. પહેલી વાર, યુએસ ડ્રગ એજન્સી એફડીએએ કંપનીની સીઆરઆઈએસપીઆર ટેકનોલોજી પર આધારિત થેરાપીને મંજૂરી આપી, જે સિકલ સેલ નામના ગંભીર રોગની સારવાર કરે છે. રેશ્મા જિંકગો બાયોવર્ક્સ નામની બીજી બાયોટેક કંપનીના બોર્ડમાં છે.

ટાઈમે આ યાદીમાં 32 દેશોના લોકોને સામેલ કર્યા છે. આમાં રાજકારણીઓ, કોર્પોરેટ સીઈઓ, રમતવીરો, કલાકારો અને કાર્યકરોનો સમાવેશ થાય છે. આ યાદીમાં અમેરિકાના રાષ્ટ્રપતિ ડોનાલ્ડ ટ્રમ્પનો પણ સમાવેશ થાય છે. આ ઉપરાંત ટ્રમ્પ પ્રશાસનના છ લોકો છે. યાદીમાં કુલ ૧૬ સીઈઓ છે.

ટ્રમ્પ ઉપરાંત બ્રિટિશ વડા પ્રધાન કીર સ્ટારમરનું નામ પણ આ યાદીમાં છે. ટેક અને બિઝનેસ દિગ્ગજોમાં માર્ક ઝુકરબર્ગ, એડવાન્સ્ડ માઈક્રો ડિવાઇસીસના સીઈઓ લિસા સુ, નેટફ્લિક્સના સીઈઓ ટેડ સારાન્ડોસ અને ઇટાલિયન-અમેરિકન આર્ટિફિશિયલ ઇન્ટેલિજન્સ સંશોધક અને એન્થ્રોપિકના સહ-સ્થાપક અને સીઈઓ ડારિયો અમોડેઈનો સમાવેશ થાય છે.