IPL 2025ની 38મી મેચ મુંબઈ ઇન્ડિયન્સ અને ચેન્નાઈ સુપર કિંગ્સ વચ્ચે મુંબઈના વાનખેડે સ્ટેડિયમમાં રમાઈ હતી. આ મેચમાં મુંબઈએ 9 વિકેટે શાનદાર જીત મેળવી.

IPL 2025ની 38મી મેચમાં મુંબઈ ઇન્ડિયન્સ અને ચેન્નાઈ સુપર કિંગ્સની ટીમો આમને-સામને હતી. આ મેચ મુંબઈના વાનખેડે સ્ટેડિયમમાં રમાઈ હતી. આ સિઝનમાં આ બંને ટીમો વચ્ચે આ બીજી ટક્કર હતી, જ્યાં મુંબઈની ટીમ બાજી મારવામાં સફળ રહી. આ પહેલા રમાયેલી મેચમાં ચેન્નાઈની ટીમે 4 વિકેટે જીત મેળવી હતી. બીજી તરફ પ્લેઓફની રેસને જોતા આ મેચ બંને ટીમો માટે ખૂબ જ મહત્વપૂર્ણ હતી. મુંબઈની આ સિઝનમાં ચોથી જીત છે. બીજી તરફ ચેન્નાઈને છઠ્ઠી હારનો સામનો કરવો પડ્યો છે.

મુંબઈએ 9 વિકેટે જીત્યો મેચ

મુંબઈ ઇન્ડિયન્સે 177 રનના ટાર્ગેટને 15.4 ઓવરમાં જ એક વિકેટના નુકસાન પર હાંસલ કરી લીધો હતો. મુંબઈ તરફથી રોહિત શર્માએ મેચ વિનિંગ ઇનિંગ રમી હતી. તેણે 45 બોલમાં અણનમ 76 રન બનાવ્યા હતા. જ્યારે સૂર્યકુમાર યાદવે પણ 30 બોલમાં અણનમ 68 રન બનાવ્યા હતા. બીજી તરફ ચેન્નાઈ માટે આ એકમાત્ર વિકેટ રવિન્દ્ર જાડેજાએ મેળવી હતી.

રવિન્દ્ર જાડેજા અને શિવમ દુબેની અડધી સદીઓની મદદથી ચેન્નાઈ સુપર કિંગ્સે 20 ઓવરમાં 5 વિકેટના નુકસાન પર 176 રન બનાવ્યા હતા. રવિન્દ્ર જાડેજાએ અણનમ 53 રન બનાવ્યા અને શિવમ દુબેએ 50 રનનું યોગદાન આપ્યું હતું. બીજી તરફ જસપ્રીત બુમરાહ 2 વિકેટ સાથે મુંબઈનો સૌથી સફળ બોલર રહ્યો હતો.