શાસના અધિકારી સહિત 4  અધિકારી કમીટીમાં: સાત દિવસમાં રિપોર્ટ આપવાનો રહેશે

જામનગરમાં દરેડ બીઆરસી ભવનમાં સમયસર ચોપડા વિતરણ ન થવાથી પુસ્તકો પલળી જતા ભારે નુકશાન થયુ હતું. આ અંગેના અહેવાલો બહાર આવતા આખરે સરકારે શાસનાધિકારી સહિત 4 અધિકારીની કમીટી બનાવી છે અને આ કમીટીને સાત દિવસમાં રિપોર્ટ આપવા જણાવાયુ છે.

આ અંગેની વિગત એવી છે કે સરકારી શાળાઓમાં 1 થી 8ના વિદ્યાર્થીઓને વિનામુલ્યે પાઠયપુસ્તકો આપવા ગાંધીનગરની વડી કચેરીએથી 8000 જેટલા પુસ્તકો આવ્યા હતા. જેને દરેડના વિદ્યા સમીક્ષા કેન્દ્રમાં રાખવામાં આવ્યા હતા. સાતમ આઠમમાં ભારે વરસાદનાં કારણે બીઆરસી ભવનમાં ગોઠણડુબ પાણી ભરાયા હતાં. જેના કારણે ધો. 1 થી 3નાં પુસ્તકો સહિત 8000 પુસ્તકો પલળી ગયા હતા. ફરજ પરના અધિકારી દ્વારા સમયસર પુસ્તકો ન અપાતા પુસ્તકો પલળી જવાથી ખર્ચ માથે પડયો હતો અને આ અંગે ભારે ઉહાપોહ થયા બાદ આખરે સરકાર દ્વારા કમીટીની રચના કરવામાં આવી છે અને હવે રિપોર્ટ આવ્યા બાદ જવાબદારો સામે નુકશાની અંગે કડક પગલા લેવામાં આવશે.