રાજકોટના કોઠારિયા વિસ્તારમાં માતાજીના માંડવામાં પશુ બલિ અટકાવવા જતા બબાલ થઈ હોવાનું સામે આવ્યું છે. ટોળાએ પોલીસની ગાડીના કાચ તોડ્યા હતા, તેમજ વાહનોમાં તોડફોડ કરી હતી. તેમજ ખુરશીઓમાં પણ તોડફોડ કરી હતી. પોલીસ પર પથ્થરમારો કર્યાની ચર્ચા થઈ રહી છે. બાદમાં પોલીસે ટોળાને વિખરેવાનું શરૂ કર્યું હતું અને 6થી વધુ શખ્સની ધરપકડ કરી લીધી છે. હાલ ઘટનાસ્થળે પોલીસનો ચુસ્ત બંદોબસ્ત ગોઠવી દેવામાં આવ્યો છે.

સ્થાનિકોએ પોલીસ પર હુમલો કર્યો

પ્રાપ્ત વિગત મુજબ, જીવ હિંસા અટકાવવા મામલે વિજ્ઞાન જાથા અને પોલીસ કોઠારિયા સોલવન્ટ પાછળ આવેલા વિસ્તારમાં પહોંચી હતી. જોકે સ્થાનિકોએ પોલીસ પર હુમલો કર્યો હતો. પોલીસની ગાડીના કાચ ફોડી વાહનોમાં તોડફોડ કરી હતી. બાદમાં પોલીસે ટોળાને વિખેરવાનું શરૂ કર્યું હતું. 

સાત બકરાની પશુબલી કરવામાં આવી

મળતી માહિતી પ્રમાણે આજે ગોંડલ ચોકડી પાસે શિવ હોટલ પાછળની શેરીમાં માંડવાનું આયોજન કરવામાં આવ્યું હતું. જેમાં સાત બકરાની પશુબલિ ચડાવવામાં આવી હતી. કુલ 10 બકરાના માથા પડ્યા હતા. પશુબલી સંબંધી આજીડેમ પોલીસ સ્ટેશનમાં ફરિયાદ દાખલ કરવામાં આવી હતી. 

​​​​​​​