અમદાવાદના ભાટ ગામમાં નશામાં ધૂત નબીરાએ બેફામ સ્પીડમાં કાર હંકારી ઘરમાં ઘૂસાડી દીધી હતી. આ અકસ્માતમાં એકનું મોત થયું છે જ્યારે બે વ્યક્તિને ઈજા પહોંચી છે. ઘટનાને પગલે લોકોના ટોળા એકત્ર થઈ ગયા હતા. તેમજ ઇજાગ્રસ્તોને સારવાર માટે હોસ્પિટલ ખસેડ્યા હતા. અકસ્માત બાદ કારનો ચાલક ફરાર થઈ ગયો હતો. 

આધેડને પાંચથી છ ફૂટ ઢસડ્યા
પ્રાપ્ત માહિતી મુજબ, શુક્રવારે મોડી રાત્રે 11:20 વાગ્યાની આસપાસ નશામાં ધૂત એક યુવક બેફામ સ્પીડમાં કાર ચલાવી ભાટ ગામમાં અશોકભાઈ પ્રજાપતિ નામના આધેડને ટક્કર મારી પાંચથી સાત ફૂટ ઢસડી કાર એક ઘરમાં ઘૂસાડી દીધી હતી. આ અકસ્માતમાં આધેડને ગંભીર ઇજાઓ પહોંચતાં તેનું ઘટનાસ્થળે જ મોત નીપજ્યું હતું.

આધેડનું ઘટનાસ્થળે જ મોત
મૃતક આધેડ ભાટ ગામમાં આવેલા ચાચરાવાડી વિસ્તારમાં આવેલા પાનના ગલ્લા પાસે ઉભા હતા. ત્યારે કાસિન્દ્રા તરફથી આવી રહેલી કારના ચાલક અંશ ઠાકોરે નશામાં ધૂત પૂરપાટ ઝડપે કાર હંકારી બે થાંભલાને ટક્કર મારી હતી. ત્યારબાદ કારચાલકે આધેડને અડફેટે લઇને એક ઘરમાં ઘૂસાડી દીધી હતી. આ અકસ્માતમાં આધેડને ગંભીર ઇજાઓ પહોંચતાં તેનું ઘટનાસ્થળે જ મોત નિપજ્યું હતું.  

અકસ્માત બાદ નબીરો ભાગી ગયો
કાર ચાલકે અન્ય બે યુવકોને પણ અડફેટે લેતાં તેમને સામાન્ય ઇજાઓ પહોંચી હતી. કારમાં યુવકની સાથે અન્ય બે વ્યક્તિઓ પણ હોવાનું સામે આવ્યું છે. અકસ્માત બાદ નબીરો ઘટનાસ્થળેથી ભાગી ગયો હતો. ત્યારબાદ સ્થાનિક ગ્રામજનોએ પોલીસને જાણ કરતાં પોલીસનો કાફલો દોડી આવ્યો હતો અને કાયદેસરની કાર્યવાહી હાથ ધરી હતી.