કસરત સ્વાસ્થ્ય માટે ફાયદાકારક છે. તેનો ફાયદો માત્ર શારીરિક જ નહીં માનસિક પણ છે. આરોગ્ય નિષ્ણાતો કહે છે કે દરરોજ કસરત અથવા વ્યાયામ કરવાથી હાડકાં અને સ્નાયુઓને મજબૂત બનાવવામાં મદદ મળે છે. આ સિવાય વજન ઘટાડવા અને હૃદયને સ્વસ્થ રાખવામાં પણ ફાયદાકારક છે, પરંતુ શું તમે ક્યારેય સાંભળ્યું છે કે ઓફિસમાં પણ દોડવાના ફાયદા મળે છે? ચીનની એક કંપનીએ પોતાના કર્મચારીઓને આવી જ એક ઓફર આપી છે.

અહેવાલ મુજબ, ગુઆંગડોંગ પ્રાંતમાં સ્થિત ડોંગપો પેપર કંપની તાજેતરમાં તેના કર્મચારીઓ માટે બોનસ સિસ્ટમ લઈને આવી છે, જે કર્મચારીઓ દ્વારા કરવામાં આવતી કસરતની માત્રા પર આધારિત છે, એટલે કે કર્મચારીઓ જેટલી વધુ કસરત કરે છે તેમને વધુ બોનસ પણ મળશે. કંપની અનુસાર, જો કોઈ કર્મચારી દર મહિને ૫૦ કિલોમીટર દોડે છે તો તેને સંપૂર્ણ માસિક બોનસ મળશે, જ્યારે તે ૪૦ કિલોમીટર દોડશે તો તેને ૬૦ ટકા બોનસ મળશે અને જો તે ૩૦ કિલોમીટર દોડશે તો તેને માત્ર ૩૦ ટકા બોનસ મળશે. જો કોઈ કર્મચારી દર મહિને ૧૦૦ કિમી દોડે છે, તો તેને આ બોનસ સિવાય ૩૦ ટકા વધુ બોનસ મળશે.

કંપની કર્મચારીઓના ફોનમાં હાજર એપ્સ દ્વારા તારણ મેળવશે અને તેના આધારે બોનસ આપવામાં આવશે. કંપનીનું કહેવું છે કે તેનો ઉદ્દેશ્ય તેના કર્મચારીઓને ફિટ અને સ્વસ્થ રહેવા માટે પ્રેરિત કરવાનો છે. કંપનીના બોસ લિન ઝિઓંગનું કહેવું છે કે જો તેના કર્મચારીઓ સ્વસ્થ હોય તો જ કંપની લાંબા સમય સુધી ટકી શકે છે. આથી કંપનીએ આ અનોખો નિર્ણય લીધો છે.

​​​​​​​કંપનીના સત્તાવાર વિચેટ  એકાઉન્ટ અનુસાર, લિન પોતે ફિટનેસ પર ઘણું ધ્યાન આપે છે. તે બે વખત માઉન્ટ એવરેસ્ટ પણ ચડી ચૂક્યો છે. કંપનીની આ નવી નીતિ ચીની સોશિયલ મીડિયા પર ખૂબ વાયરલ થઈ રહી છે.