મહારાષ્ટ્રમાં ગયા વર્ષની રાજકીય ઉથલપાથલ અને સત્તા પરિવર્તન સંબંધિત મુદ્દા પર બે હરીફ જૂથો, ઉદ્ધવ ઠાકરે અને CM એકનાથ શિંદે દ્વારા દાખલ કરાયેલી વિવિધ અરજીઓ પર સુપ્રીમ કોર્ટે આજે પોતાનો ચુકાદો આપ્યો હતો. કોર્ટે કહ્યું કે આ મામલે કોઈ નિર્ણય લેવો ખૂબ જ વહેલો છે, તેથી તેને 7 જજોની મોટી બેંચને સોંપવામાં આવી રહ્યો છે.

ગયા વર્ષે એકનાથ શિંદે અને તેમના જૂથના કેટલાક ધારાસભ્યોએ બળવો કર્યો હતો અને તે પછી ઉદ્ધવ ઠાકરેના નેતૃત્વમાં તત્કાલીન મહા વિકાસ આઘાડી (MVA) ગઠબંધન સરકાર પડી ગઈ હતી.

SCએ તેના ચુકાદામાં જણાવ્યું હતું કે તત્કાલિન સીએમ ઉદ્ધવ ઠાકરેએ ફ્લોર ટેસ્ટનો સામનો કર્યો ન હતો તેથી MVA સરકારને પુનઃસ્થાપિત કરી શકાય નહીં. કોર્ટે કહ્યું કે રાજ્યપાલ માટે સૌથી મોટી પાર્ટી બીજેપીના સમર્થનથી એકનાથ શિંદેને શપથ લેવડાવે તે યોગ્ય છે.
​​​​​​​

સુપ્રીમ કોર્ટે પોતાના નિર્ણયમાં કહ્યું કે ઉદ્ધવ ઠાકરે સરકારને પુનઃસ્થાપિત કરી શકાય નહીં. આ સાથે કોર્ટે કહ્યું કે જો ઉદ્ધવે રાજીનામું ન આપ્યું હોત તો સ્થિતિ અલગ હોત.

સુપ્રીમ કોર્ટે વધુમાં જણાવ્યું હતું કે શિવસેના પાર્ટીના મુખ્ય દંડક તરીકે ગોગાવાલે (શિંદે જૂથ)ની નિમણૂક કરવાનો સ્પીકરનો નિર્ણય ગેરકાયદેસર હતો. કોર્ટે કહ્યું કે, પાર્ટીના આંતરિક વિવાદોને ઉકેલવા માટે ફ્લોર ટેસ્ટનો ઉપયોગ કરી શકાય નહીં. બંધારણ કે કાયદો રાજ્યપાલને રાજકીય ક્ષેત્રમાં પ્રવેશવાની અને આંતર-પક્ષીય વિવાદોમાં ભૂમિકા ભજવવાની સત્તા આપતું નથી.

બંધારણીય બેંચે સંબંધિત અરજીઓ પર સુનાવણી પૂર્ણ કર્યા બાદ 16 માર્ચે પોતાનો નિર્ણય સુરક્ષિત રાખ્યો હતો. આ મામલે અંતિમ સુનાવણી 21 ફેબ્રુઆરીએ શરૂ થઈ હતી અને નવ દિવસ સુધી બંને પક્ષોની દલીલો સાંભળવામાં આવી હતી.

સુનાવણીના છેલ્લા દિવસે સર્વોચ્ચ અદાલતે આશ્ચર્ય વ્યક્ત કર્યું હતું કે તે ઉદ્ધવ ઠાકરેની સરકારને કેવી રીતે પુનઃસ્થાપિત કરી શકે છે જ્યારે તત્કાલિન મુખ્યમંત્રી ગૃહમાં ફ્લોર ટેસ્ટનો સામનો કરતા પહેલા જ રાજીનામું આપી ચૂક્યા હતા.

સુનાવણી દરમિયાન, ઠાકરે જૂથે, અરુણાચલ પ્રદેશના મુખ્ય પ્રધાન નબામ તુકીની સરકારને પુનઃસ્થાપિત કરનાર તેના 2016 ના ચુકાદાને અનુસરીને, સુપ્રીમ કોર્ટને તેમની સરકારને પુનઃસ્થાપિત કરવા વિનંતી કરી.