જાપાનથી એક ભયાનક દુર્ઘટનાના મોટા સમાચાર આવી રહ્યા છે, જ્યાં ટોક્યો એરપોર્ટ પર લેન્ડિંગ કરતી વખતે એક પ્લેનમાં અચાનક આગ લાગી ગઈ. જાપાની સમાચાર એજન્સી દ્વારા આ અકસ્માતની પુષ્ટિ કરવામાં આવી છે. આ કેસમાં અત્યાર સુધી મળેલી માહિતી અનુસાર, લેન્ડિંગ દરમિયાન પ્લેન અન્ય પ્લેન સાથે અથડાવાને કારણે આ દુર્ઘટના થઈ હોવાની આશંકા છે.

જોકે, તેનું સાચું કારણ હજુ સુધી સ્પષ્ટપણે જાણી શકાયું નથી. સંબંધિત વિભાગો આ મામલાની સતત તપાસ કરી રહ્યા છે અને સત્ય જાણવાનો પ્રયાસ કરી રહ્યા છે. આ ભયાનક દુર્ઘટનાથી સંબંધિત એક વીડિયો શેર કરાયો છે, જેમાં પ્લેનની બારીમાંથી અને તેની નીચેથી આગની જ્વાળાઓ સ્પષ્ટપણે જોઈ શકાય છે. જણાવવામાં આવ્યું છે કે દુર્ઘટનામાં સામેલ ફ્લાઈટ નંબર JAL 516 હતી, જે હોક્કાઈડોથી ઉડાન ભરી હતી.


જાપાન એરલાઇન્સના વિમાનમાં કુલ 379 મુસાફરો સવાર હતા. જોકે, ઘટના બાદ તરત જ તમામ મુસાફરોને વિમાનમાંથી સુરક્ષિત રીતે બહાર કાઢવામાં આવ્યા હતા. રિપોર્ટ અનુસાર, ટક્કર બાદ પેસેન્જર પ્લેનના પાછળના ભાગમાં આગ લાગી ગઈ હતી. મુસાફરોને બહાર કાઢવામાં આવ્યા ત્યાં સુધીમાં આગ આખા પ્લેનમાં લપેટમાં આવી ગઈ હતી.


કોસ્ટ ગાર્ડના વિમાનમાં કેટલા લોકો સવાર હતા તે અંગેની માહિતી હજુ સામે આવી નથી. સ્થાનિક મીડિયાના અહેવાલો અનુસાર, કોસ્ટ ગાર્ડના વિમાનને પણ નુકસાન થયું છે, જો કે તેમાં આગ લાગવાના કોઈ સમાચાર નથી.ઘટનાની કેટલીક તસવીરો પણ સામે આવી છે, જેમાં પ્લેનની અંદર આગ ફેલાતી જોવા મળી રહી છે. આ પ્લેન જાપાનના શિન ચિટોઝ એરપોર્ટથી ઉડાન ભરીને હનેદા પહોંચ્યું હતું. એરપોર્ટ પર ઉતર્યા બાદ રનવે પર જ બે વિમાનો અથડાયા હતા.