બિહારના નાયબ મુખ્યમંત્રી તેજસ્વી યાદવને સરકારી પ્રવાસ માટે વિદેશ જવાની પરવાનગી મળી ગઈ છે. દિલ્હીની રાઉઝ એવન્યુ કોર્ટે તેજસ્વી યાદવને તા.6 થી 18 જાન્યુઆરી સુધી ઓસ્ટ્રેલિયા અને ન્યુઝીલેન્ડના સરકારી પ્રવાસ પર જવાની મંજૂરી આપી હતી. કોર્ટે તેજસ્વી યાદવને 25 લાખ રૂપિયાની FDR જમા કરાવવા કહ્યું છે. કોર્ટે કહ્યું કે, વિદેશ પ્રવાસ દરમિયાન તેજસ્વી યાદવ કોર્ટને ઓસ્ટ્રેલિયા અને ન્યુઝીલેન્ડમાં તેમના રોકાણના સ્થળ અને મોબાઈલ નંબર વિશે જાણકારી આપશે. કોર્ટે કહ્યું કે, વિદેશ પ્રવાસ દરમિયાન તેજસ્વી યાદવ પુરાવા અને સાક્ષીઓને પ્રભાવિત કરવાનો પ્રયાસ નહીં કરે. તેજસ્વી યાદવે એશિયન ડેવલપમેન્ટ બેંક અને બિહાર સરકારના સંયુક્ત પ્રોજેક્ટ '6 લેન ગંગા બ્રિજ પ્રોજેક્ટ'ના સંબંધમાં વિદેશ પ્રવાસની પરવાનગી માંગી છે.

એન્જિનિયરો પણ વિદેશ જશે

તેજસ્વી યાદવની સાથે, બિહાર સરકારના 4 વરિષ્ઠ અધિકારીઓ અને બિહાર સરકારના રોડ કન્સ્ટ્રક્શન વિભાગના 16 એન્જિનિયરો પણ તેમની સાથે વિદેશના સરકારી પ્રવાસે જશે. રાઉઝ એવન્યુ કોર્ટે તેજસ્વી યાદવના પાસપોર્ટને એક વર્ષ માટે રિન્યૂ કરવાની મંજૂરી પણ આપી હતી.

જમીનના બદલામાં નોકરીના કેસમાં ચાલી રહી છે સુનાવણી

જમીન-નોકરીના કેસમાં આરજેડીના વડા લાલુ પ્રસાદ યાદવ, રાબડી દેવી અને તેજસ્વી યાદવ સહિત 17 આરોપીઓ સામે આરોપો ઘડવામાં આવનાર છે. આ મામલામાં કેટલાક આરોપીઓ તરફથી ચાર્જશીટથી જોડાયેલા દસ્તાવેજોની માંગ કરતી અરજી દાખલ કરવામાં આવી છે. કોર્ટે સીબીઆઈને સંબંધિત દસ્તાવેજો આપવા કહ્યું છે. આ કેસની આગામી સુનાવણી 6 જાન્યુઆરીએ રારૂઝ એવન્યુ કોર્ટમાં થશે. તેજસ્વી યાદવે ઓસ્ટ્રેલિયા જવા માટે રાઉઝ એવન્યુ કોર્ટ પાસે પરવાનગી માંગી હતી.