નીતિશ સરકારનો ફ્લોર ટેસ્ટ હજુ બાકી ; જીતનરામ માંઝીની ‘હમ’ માટે બે મંત્રી પદની માંગ બાદ કોંગ્રેસની જાહેરમાં ઓફર 

બિહારમાં એનડીએ સરકાર બની ગઈ છે, પરંતુ ફ્લોર ટેસ્ટ હજુ બાકી છે. આ સાથે હજુ સુધી મંત્રીમંડળનું વિસ્તરણ કરવામાં આવ્યું નથી. કેબિનેટ વિસ્તરણ પહેલા 'હમ'ના કન્વીનર જીતનરામ માંઝી આ દિવસોમાં ચર્ચામાં છે. જીતન રામ માંઝી 'હમ' માટે બે મંત્રી પદની માંગ કરી રહ્યા છે. ત્યારે હવે સમાચાર આવી રહ્યા છે કે કોંગ્રેસે તેમને સીએમ પદની ઓફર કરી છે.

જ્યારે કોંગ્રેસના પ્રદેશ અધ્યક્ષ અખિલેશ પ્રસાદ સિંહને પ્રશ્ન પૂછવામાં આવ્યો હતો કે તેઓ એનડીએ સરકારમાં બે બેઠકોની માંગ કરી રહ્યા છે. તેના પર અખિલેશ પ્રસાદ સિંહે જીતન રામ માંઝીને ખુલ્લી ઓફર આપી હતી. તેમણે કહ્યું કે તેઓ અમારી સાથે આવે તો અમે તેમને સીએમ બનાવીશું. આ નિવેદન બાદ બિહારના રાજકારણમાં અટકળોનો દોર શરૂ થઈ ગયો છે.

દરમિયાન, આ મુદ્દે આરજેડીના પ્રવક્તા મૃત્યુંજય તિવારીએ કહ્યું કે બધું જ સાર્વજનિક ન કરી શકાય. તેજસ્વી યાદવ માત્ર ચોંકાવનારા સમાચારો માટે જ જાણીતા છે. તેણે સ્પષ્ટ કહ્યું છે કે રમત હજુ ચાલુ છે. મહાગઠબંધનથી અલગ થયા બાદ સીએમ નીતિશ કુમાર એનડીએમાં સામેલ થયા હતા. આ નવી સરકારમાં ભાજપમાંથી બે ડેપ્યુટી સીએમ બનાવવામાં આવ્યા છે. 'હમ'ના પ્રમુખ સંતોષ સુમને પણ મંત્રી પદના શપથ લીધા. આ સાથે અપક્ષ ધારાસભ્ય સુમિત સિંહે પણ મંત્રી પદના શપથ લીધા. કેબિનેટ વિસ્તરણ પહેલા જીતન રામ માંઝીએ બે મંત્રી પદની માંગ કરી છે.