એલજીબીટીક્યું+ કોમ્યુનીટીને મળી મોટી જીત ; ઓર્થોડોક્સ ચર્ચના ઉગ્ર વિરોધ વચ્ચે સરકારને મળી વિપક્ષની મદદ

દક્ષિણ યુરોપમાં આવેલા રૂઢીવાદી દેશ ગ્રીસની સંસદે એક ઐતિહાસિક નિર્ણય લીધો છે જેની ખૂબ ચર્ચા થઈ રહી છે. હવે ગ્રીસમાં સમલૈંગિક લગ્નને કાનૂની માન્યતા મળી ગઈ છે. આવું કરનાર ગ્રીસ પ્રથમ બહુમતી ઓર્થોડોક્સ ખ્રિસ્તી દેશ બની ગયો છે. એવું કહેવાય છે કે ગ્રીસની મોટાભાગની વસ્તી અંધશ્રદ્ધાળુ છે. પરંતુ સંસદે ગુરુવારે ગે લગ્નને કાયદેસર કરતો કાયદો પસાર કર્યો હતો.

આ દરમિયાન ત્યાંના વડાપ્રધાને તેને ગ્રીસમાં માનવાધિકારની ઐતિહાસિક જીત ગણાવી અને કહ્યું કે આ નવો કાયદો સમાજમાં અસમાનતા દૂર કરશે. ગ્રીસમાં સમલૈંગિક લગ્નની માન્યતા એ પણ ઐતિહાસિક છે કારણ કે જ્યારે સંસદમાં તેના પર ચર્ચા શરૂ થઈ ત્યારે અહીંનું શક્તિશાળી ઓર્થોડોક્સ ચર્ચ તેની વિરુદ્ધ ઊભું હતું. ગ્રીસની રાજધાની એથેન્સમાં પણ ચર્ચના સમર્થકોએ વિરોધ રેલી કાઢી હતી. ઘણા લોકો બેનરો, ક્રોસ અને બાઈબલ લઈને રસ્તા પર ઉતરી આવ્યા હતા.

ઓર્થોડોક્સ ચર્ચના વડા કહે છે કે આ પગલું ગ્રીસની સામાજિક એકતાને નષ્ટ કરશે. ચર્ચના જોરદાર વિરોધ છતાં સંસદે ગે યુગલોની તરફેણમાં ચુકાદો આપ્યો. ગ્રીસની સંસદમાં ૩૦૦ સભ્યો છે. કાયદો પસાર કરવા માટે સાદી બહુમતી જરૂરી હતી. પરંતુ બહુમતી હાંસલ કરવી એટલી સરળ ન હતી. આ બિલને વડાપ્રધાનનું સમર્થન હતું પરંતુ તેને પસાર કરવા માટે વિરોધ પક્ષોના સમર્થનની જરૂર હતી. પરંતુ કેન્દ્રના જમણેરી પાર્ટીના ડઝનબંધ સાંસદો તેની વિરુદ્ધ હતા.

બે દિવસમાં ૩૦ કલાકથી વધુની ચર્ચા બાદ ૩૦૦ બેઠકોની સંસદમાં આ બિલ પસાર કરવામાં આવ્યું હતું. તરફેણમાં ૧૭૬ અને વિરોધમાં ૭૬ મત પડ્યા હતા. કુલ ૨૫૪ લોકોએ મતદાન કર્યું હતું. દેશના એલજીબીટીક્યું+ સમુદાયે આ નિર્ણયને આવકાર્યો છે. તેમનું કહેવું છે કે આનાથી ઘણા લોકોનું જીવન વધુ સરળ બનશે, ખાસ કરીને એવા બાળકો કે જેઓ અનિશ્ચિતતામાં જીવી રહ્યા છે.

બોક્સ

ગ્રીસની માનવાધિકારની પ્રતિષ્ઠા મજબૂત થશે

આ કાયદો દેશને અન્ય ૨૦ યુરોપિયન દેશોની બરાબરી પર લાવે છે. તે આગામી યુરોપીયન ચૂંટણી પહેલા તેના માનવાધિકાર પ્રમાણપત્રોને પણ મજબૂત બનાવશે. તે શાસક પક્ષને તેના વિરોધીઓના સ્થળાંતર દબાણ અને મીડિયાની સ્વતંત્રતામાં ઘટાડા અંગેના તાજેતરના આક્ષેપોથી દૂર રાખવામાં પણ મદદ કરશે. રિપોર્ટર્સ વિથાઉટ બોર્ડર્સના ૨૦૨૩ વર્લ્ડ પ્રેસ ફ્રીડમ ઈન્ડેક્સમાં ગ્રીસ છેલ્લા ક્રમે હતું.

બોક્સ

આ દેશોમાં ગે લગ્ન છે કાયદેસર

ગે લગ્નને કાયદેસર બનાવનાર નેધરલેન્ડ પ્રથમ દેશ છે. ત્યાં એપ્રિલ ૨૦૦૧થી સમલૈંગિક લગ્ન કાયદેસર છે. જોકે, ડેનમાર્કે ૧૯૮૯માં જ સમલૈંગિક યુગલોને ઘરેલુ ભાગીદાર તરીકે નોંધણી કરવાની પરવાનગી આપી હતી. પરંતુ કોઈ ઔપચારિક કાયદો બનાવવામાં આવ્યો ન હતો. ડેનમાર્કે તેને ૨૦૧૨માં જ કાયદો બનાવ્યો હતો. આ સિવાય આ સબંધોને કાયદાકીય માન્યતા આપનાર દેશોમાં બેલ્જિયમ, કેનેડા, સ્પેન, દક્ષિણ આફ્રિકા, નોર્વે, સ્વીડન, આઈસલેન્ડ, પોર્ટુગલ, આર્જેન્ટિના, બ્રાઝિલ, ઈંગ્લેન્ડ, વેલ્સ, કોસ્ટા રિકા, તાઈવાન જેવા દેશોનો સમાવેશ થાય છે.

બોક્સ

ભારતમાં હજુ સુધી નથી મળી માન્યતા

ગયા વર્ષે સુપ્રીમ કોર્ટે સમલૈંગિક લગ્નને કાનૂની માન્યતા આપવાનો ઇનકાર કરી દીધો હતો. કોર્ટે લગ્નને મૂળભૂત અધિકાર તરીકે ન ગણતા કહ્યું કે તે સ્પેશિયલ મેરેજ એક્ટ, ૧૯૫૪માં કંઈપણ ઉમેરી શકે નહીં, કારણ કે તેની સત્તા વિધાનસભા પાસે છે. કોર્ટે પોતાના નિર્ણયમાં કહ્યું કે સમલૈંગિક લગ્નને માન્યતા આપવી સંસદનું કામ છે. હવે તે સરકાર પર નિર્ભર છે કે તે આ અંગે શું પગલાં લે છે.