વજન ઘટાડવા માટેના નિયમો મુજબ સામાન્યરીતે બહારનું જંક ફૂડ ખાવાની મનાઈ છે. પરંતુ એક પર્સનલ ટ્રેનરે એવો દાવો કર્યો છે જે જંક ફૂડના શોખીનોને ખુશ કરી દેશે. તેનું કહેવું છે કે પિઝા ખાવાથી તેણે માત્ર એક મહિનામાં ૬ કિલો વજન ઘટાડ્યું છે અને તેનું પેટ પાતળું થઈ ગયું છે.

યુકેના ૧૮ વર્ષીય પર્સનલ ટ્રેનર જેડન લીએ પોતાના ઇન્સ્ટાગ્રામ પર વજન ઘટાડવાની જર્ની શેર કરી છે. અહેવાલ મુજબ, તેણે સાબિત કરવું પડ્યું કે વજન ઘટાડવા માટે, જંક ફૂડ અને પ્રોસેસ્ડ ફૂડને સંપૂર્ણપણે છોડી દેવાની જરૂર નથી, તમારે ફક્ત કેલરીનું ધ્યાન રાખવું પડશે. આ માટે તેણે ૩૦ દિવસ સુધી દરરોજ નાની સાઈઝનો પિઝા ખાધો.

દાવા મુજબ, ૩૧ જાન્યુઆરીએ ટ્રેનરનું વજન ૧૬૧.૬૦ પાઉન્ડ હતું. જે ૩૧ દિવસ પછી લગભગ ૧૩ પાઉન્ડ ઘટીને ૧૪૮.૩૭ પાઉન્ડ થઈ ગયું. આ સમયગાળા દરમિયાન, તેણે દરરોજ ફક્ત ૨૫૦૦ કેલરીનો વપરાશ કર્યો અને લગભગ ૬ કિલો વજન ઘટાડ્યું, જેમાં તેના પેટની ચરબી દૂર થઈ ગઈ. તેની ઊંઘ પણ સુધરી અને એનર્જી લેવલ સુધર્યું.

પર્સનલ ટ્રેઈનરે જણાવ્યું કે પિઝા સિવાય તેના ડાયેટમાં હાઈ પ્રોટીન, હાઈ વોલ્યુમ અને ન્યુટ્રિશનથી ભરપૂર ખોરાકનો સમાવેશ થાય છે. જેથી પેટ લાંબા સમય સુધી ભરેલું રહે છે અને એનર્જીની કમી ન થાય. આ ખોરાકમાં બનાના પ્રોટીન પેનકેક, ચોકલેટ પ્રોટીન ઓટ્સ, શાકભાજી સાથે સ્ક્રેમ્બલ્ડ એગ અને કેળા, કિસમિસ અને પીનટ બટર સાથે બેગેલ્સનો સમાવેશ થાય છે.

જેડન લીએ કહ્યું કે વજન ઘટાડવા માટે કોઈ ખાસ ખોરાક છોડવા કરતાં એક્સરસાઇઝ પર ધ્યાન આપવું વધુ જરૂરી છે. તેમની વજન ઘટાડવાની દિનચર્યામાં ૪૫-મિનિટની હાઈ-સ્ટ્રિક્ટ વર્કઆઉટનો સમાવેશ થતો હતો, જેમાં કાર્ડિયો અને ક્યારેક સ્ટ્રેન્થ ટ્રેનિંગનો સમાવેશ થતો હતો.