22મી માર્ચથી ક્રિકેટ ફેન્સની ફેવરીટ ટુર્નામેન્ટનો પ્રારંભ : ટી-20 વર્લ્ડ કપ માટે યુવા ભારતીય ખેલાડીઓની ગેમ પર બીસીસીઆઈ રખાશે નજર 

ઈન્ડિયન પ્રીમિયર લીગમાં, વિશ્વભરના દમદાર ખેલાડીઓ તેમની રમતથી દર્શકોનું મનોરંજન કરે છે. પરંતુ આ વખતે સ્થિતિ અલગ છે. હાલમાં, ફાસ્ટ ક્રિકેટ પર વધુ ધ્યાન અપાઈ રહ્યું છે અને યુવા ખેલાડીઓ આને સારી રીતે સમજી ગયા છે. આ વખતે આઈપીએલની હરાજીમાં, અનકેપ્ડ ખેલાડીઓને તમામ ટીમોમાં સામેલ કરવામાં આવ્યા છે. આમાં કેટલાક ભારતીય ખેલાડીઓ છે તો કેટલાક વિદેશી ખેલાડીઓ છે. 

આ વર્ષે અનકેપ્ડ ખેલાડીઓ પણ કરોડોમાં વેચાયા છે. ભારતીય ટીમ ટી-20 વર્લ્ડ કપમાં રોહિત શર્માના નેતૃત્વમાં રમશે. પરંતુ ભારતીય પસંદગીકારોની નજર આઈપીએલમાં ખેલાડીઓના પ્રદર્શન પર ટકેલી રહેશે. આ વખતે પણ લીગમાં ઘણી નવી પ્રતિભાઓ જોવા મળશે, તેમાંના અનકેપ્ડ યુવા ભારતીય ખેલાડીઓ કરોડો રૂપિયામાં વેચાયા છે. જો તેઓ કંઈક અદ્ભુત ગેમ રમે તો કદાચ તે આઈસીસી ટી-20 વર્લ્ડ કપમાં ટીમ ઈન્ડિયા તરફથી રમતા જોવા મળશે.

સમીર રિઝવી, ચેન્નાઈ સુપર કિંગ્સ

ચેન્નાઈ સુપર કિંગ્સે ઉત્તર પ્રદેશના બેટ્સમેન સમીર રિઝવીને પોતાની ટીમમાં સામેલ કર્યો છે, જેણે સીકે નાયડુમાં ત્રેવડી સદી ફટકારી હતી. એમએસ ધોનીની આગેવાની હેઠળની ટીમે આ 20 વર્ષીય અનકેપ્ડ ખેલાડી માટે 8 કરોડ 40 લાખ રૂપિયાની બોલી લગાવી હતી. તેનું સૌથી મોટું કારણ ગત વર્ષે રમાયેલી યુપી ટી-20 લીગમાં રિઝવીનું શાનદાર પ્રદર્શન હતું. કાનપુર સુપરસ્ટાર્સ તરફથી રમતા સમીરે નવ ઇનિંગ્સમાં બે સદી સાથે 455 રન બનાવ્યા હતા. 

શુભમ દુબે, રાજસ્થાન રોયલ્સ 

સ્થાનિક ક્રિકેટ ટીમ વિદર્ભના મિડલ ઓર્ડર બેટ્સમેન શુભમ દુબેને રાજસ્થાન રોયલ્સે 5 કરોડ 80 લાખ રૂપિયામાં ટીમમાં સામેલ કર્યો હતો. અનકેપ્ડ ખેલાડી શુભમે સૈયદ મુશ્તાક અલી ટ્રોફી 2023-24ની સાત મેચોમાં 73.66ની સરેરાશથી 221 રન બનાવ્યા હતા. શુભમે અત્યાર સુધી 20 T20 મેચમાં 485 રન બનાવ્યા છે. તેનો સ્ટ્રાઈક રેટ 145.20 છે.

કુમાર કુશાગ્ર દિલ્હી કેપિટલ્સ

આઈપીએલની 17મી સિઝનની હરાજીમાં ચેન્નાઈ, દિલ્હી અને ગુજરાતે ઝારખંડના અનકેપ્ડ વિકેટ-કીપર બેટ્સમેન 19 વર્ષીય કુમાર કુશાગ્રને ટીમમાં સામેલ કરવા માટે બોલી લગાવી હતી. આખરે દિલ્હી કેપિટલ્સે તેને 7 કરોડ 20 લાખ રૂપિયામાં પોતાની ટીમમાં સામેલ કર્યો. કુશાગ્રાએ લિસ્ટ-એ ક્રિકેટની 23 મેચોમાં 46.66ની એવરેજથી 700 રન બનાવ્યા છે, જેમાં 7 અડધી સદીનો સમાવેશ થાય છે. તેણે 19 ફર્સ્ટ ક્લાસ મેચમાં 1245 રન બનાવ્યા છે.

સ્પેન્સર જોન્સન, ગુજરાત ટાઇટન્સ

6 ફૂટ 4 ઈંચ ઉંચા ઓસ્ટ્રેલિયન ફાસ્ટ બોલર સ્પેન્સર જોનસન ગયા વર્ષે ઈન્દોરમાં ભારત સામે ઓડીઆઈ રમ્યો હતો. તેણે આઠ ઓવરમાં 61 રન આપ્યા હતા. આ વખતે આઈપીએલમાં ગુજરાત ટાઇટન્સે તેને 10 કરોડ રૂપિયામાં ખરીદ્યો હતો. તેના બોલમાં અદભૂત ઉછાળો છે. બીબીએલમાં બ્રિસ્બેન હીટ માટે સ્ટ્રાઈક બોલર હોવા ઉપરાંત, 28 વર્ષીય ફાસ્ટ બોલર સ્પેન્સર ધ હંડ્રેડ, એમએલસી અને ગ્લોબલ ટી20 કેનેડાનો પણ ભાગ છે.

રચિન રવિન્દ્ર, સીએસકે

ભારતીય મૂળના રચિન રવિન્દ્ર ન્યુઝીલેન્ડ માટે આંતરરાષ્ટ્રીય ક્રિકેટ રમે છે. તે મોટા શોટ અને લાંબી ઇનિંગ્સ માટે જાણીતો છે. ડેવોન કોનવેની ઈજા પછી, રચિન રવિન્દ્ર સીએસકેનો ભાગ બન્યો અને તેને ચેન્નાઈએ 1.8 કરોડ રૂપિયામાં ખરીદ્યો. આ 24 વર્ષીય ખેલાડી એક ઉપયોગી સ્પિનર પણ સાબિત થઈ શકે છે, જે સીએસકે માટે ફાયદાકારક સાબિત થશે.