સ્પીકરે વ્હીપના ઉલ્લંઘન પર કરી કાર્યવાહી, અન્ય ૪ કોંગી નેતાઓ હાઈકમાન્ડથી નારાઝ 

હિમાચલ પ્રદેશના સ્પીકર કુલદીપ સિંહ પઠાનિયાએ રાજ્યસભાની ચૂંટણીમાં બળવો કરનાર તમામ ૬ ધારાસભ્યોને ગેરલાયક ઠેરવ્યા છે. તેમણે કહ્યું કે પક્ષપલટા વિરોધી કાયદા હેઠળ ૬ માનનીય ધારાસભ્યો વિરુદ્ધ ફરિયાદ ધારાસભ્ય અને મંત્રી હર્ષવર્ધન જી દ્વારા અમારા સચિવાલયને મળી હતી. જે બાદ તેણે બંને પક્ષોને સાંભળીને પોતાનો નિર્ણય સંભળાવ્યો હતો.

સ્પીકર કુલદીપ સિંહ પઠાણિયાએ કહ્યું, 'ધારાસભ્યો કોંગ્રેસ પાર્ટી તરફથી ચૂંટણી લડ્યા હતા, પરંતુ પાર્ટીના વ્હીપનું ઉલ્લંઘન કર્યું હતંઠ અને ઉમેદવારની તરફેણમાં મતદાન કર્યું ન હતું. મેં બધી બાજુઓ સાંભળી, મારા ઓર્ડરના ત્રીસ પાના છે... મેં આ બાબત સંપૂર્ણ સાંભળી, મેં બંને પક્ષોને સંપૂર્ણ સાંભળ્યા અને પછી મારો નિર્ણય આપ્યો. જે ધારાસભ્યોને ગેરલાયક ઠેરવવામાં આવ્યા છે તેમાં સુધીર શર્મા, રવિ ઠાકુર, રાજેન્દ્ર સિંહ રાણા, ચૈતન્ય શર્મા, દેવેન્દ્ર ભુટ્ટો, ઈન્દર દત્ત લખનપાલના નામ છે. આ તમામ ધારાસભ્યોએ વ્હીપનું ઉલ્લંઘન કર્યું હતું.

હિમાચલ પ્રદેશ વિધાનસભામાં કોંગ્રેસના ૪૦ ધારાસભ્યો હતા. ૬૮ સભ્યોની વિધાનસભામાં બહુમતી માટે જરૂરી આંકડો ૩૫ હતો. રાજ્યસભાની ચૂંટણીમાં છ ધારાસભ્યોએ ક્રોસ વોટિંગ કર્યું હતું. આ ધારાસભ્યોના બળવા પછી, કોંગ્રેસ નંબર ગેમમાં ૪૦ થી ઘટીને ૩૪ પર આવી ગઈ હતી, જે બહુમત માટે જરૂરી આંકડા કરતા એક ઓછી હતી. હવે સ્પીકરે તેના ૬ બળવાખોર ધારાસભ્યોને ગેરલાયક ઠેરવ્યા છે જેમણે ગૃહના સભ્યપદમાંથી ક્રોસ વોટિંગ કર્યું હતું. આવી સ્થિતિમાં હવે વિધાનસભાની સંખ્યા ૬૨ થઈ ગઈ છે. અને બહુમત માટે હવે ૩૨ વોટ જરૂરી થઈ ગયા છે. રાજ્યમાં ભાજપ પાસે ૨૫ ધારાસભ્યો છે અને ત્રણ અપક્ષો પણ તેની કોર્ટમાં છે. આ ઉપરાંત કોંગ્રેસના અન્ય ૪ ધારાસભ્યોએ આજે મુખ્યમંત્રી સાથે હાઈ ટીમાં હાજરી આપી ન હતી. તેથી, સ્પીકરના નિર્ણય છતાં, સરકાર પરનો ખતરો હજુ પણ ઓછો થયો નથી.

હિમાચલ પ્રદેશમાં રાજ્યસભાની એક બેઠક માટે ચૂંટણી હતી. તેને જીતવા માટે ૩૫ ધારાસભ્યોના વોટની જરૂર હતી. કોંગ્રેસ પાસે ૪૦ ધારાસભ્યો છે તેથી પાર્ટીના ઉમેદવાર અભિષેક મનુ સિંઘવીની જીત લગભગ નિશ્ચિત માનવામાં આવી રહી હતી. અહીં ભાજપના ૨૫ ધારાસભ્યો છે. તેમની પાસે ૧૦ મત ઓછા હતા, છતાં પાર્ટીએ હર્ષ મહાજનને પોતાનો ઉમેદવાર બનાવ્યો. જ્યારે ચૂંટણી યોજાઈ ત્યારે કોંગ્રેસના ૬ ધારાસભ્યોએ ક્રોસ વોટિંગ કર્યું હતું. ત્રણ અપક્ષ ધારાસભ્યોએ પણ ભાજપના ઉમેદવારના સમર્થનમાં મતદાન કર્યું હતું. જેના કારણે ભાજપ અને કોંગ્રેસ બંને પક્ષોના ઉમેદવારોને ૩૪-૩૪ મત મળ્યા હતા. આખરે ચિઠ્ઠીઓ મારફત નિર્ણય લેવાયો હતો, જેમાં ભાજપના હર્ષ મહાજનનો વિજય થયો હતો.