હાલ ગુજરાતમાં વરસાદ મન મુકીને વર્સી રહ્યો છે. છેલ્લા 4 દિવસથી દક્ષિણ ગુજરાત અને સૌરાષ્ટ્રમાં ભારે વરસાદ પડી રહ્યો છે. રાજ્યના 75 તાલુકાઓમાં છેલ્લા 24 કલાકમાં વરસાદ નોંધાયો છે, જ્યારે 11 તાલુકાઓમાં એક ઇંચથી વધુ વરસાદ નોંધાયો છે.

આ સાથે જ નવસારી જિલ્લામાં ચાર કલાકમાં 13 ઈંચ વરસાદ પડતાં પૂરની સ્થિતિ સર્જાઈ છે. નીચાણવાળા વિસ્તારોના મકાનો 5 ફૂટ સુધી પાણીમાં છે. રસ્તાઓ ભરાઈ જવાના કારણે જનજીવન અસ્તવ્યસ્ત બની ગયું છે. ગિરનાર અને દાતાર પર્વત પર ભારે વરસાદને કારણે કાળવા નદીના નીરમાં વધારો થયો છે.


આ સાથે જ હવામાન વિભાગે આજે ભાવનગર, નવસારી અને વલસાડમાં રેડ એલર્ટ જાહેર કર્યું છે. નવસારી જિલ્લાના ગ્રામ્ય વિસ્તારોમાં પણ ભારે વરસાદ પડ્યો હતો, જેના કારણે બીલીમોરાને જોડતી કેનાલ ઓવરફ્લો થઇ છે.