મનોરંજન જગતમાંથી ખરાબ સમાચાર સામે આવ્યા છે. સુપ્રસિદ્ધ ગાયક પંકજ ઉધાસનું નિધન થયું છે. તેમણે 72 વર્ષની વયે અંતિમ શ્વાસ લીધા છે. પંકજની પુત્રી નયાબ ઉધાસે ગાયકના મૃત્યુના સમાચાર શેર કર્યા છે. પોસ્ટમાં તેણે લખ્યું - ખૂબ જ દુઃખ સાથે અમને જણાવવું પડે છે કે પદ્મશ્રી પંકજ ઉધાસનું 26 ફેબ્રુઆરી 2024ના રોજ નિધન થયું છે. તેઓ લાંબા સમયથી બીમાર હતા.

મળતી માહિતી મુજબ, બિમારીના કારણે તેમને તાજેતરમાં મુંબઈની એક હોસ્પિટલમાં દાખલ કરવામાં આવ્યા હતા, પરંતુ આજે બપોરે અચાનક તેમની તબિયત બગડતાં તેમનું મૃત્યુ થયું હતું. પંકજ ઉધાસના પરિવારે તેમના મૃત્યુની પુષ્ટિ કરી છે. ઉધાસના નિધનથી બોલિવૂડ અને રાજકારણ સહિત તમામ મોટી હસ્તીઓમાં શોકનો માહોલ છે. પંકજ ઉધાસને 2006માં પદ્મશ્રી એનાયત કરવામાં આવ્યો હતો.

પંકજ ઉધાસના પીઆરએ જણાવ્યું કે ગાયકનું 26 ફેબ્રુઆરીએ સવારે 11 વાગ્યે બ્રીચ કેન્ડી હોસ્પિટલમાં અવસાન થયું હતું. તેઓ લાંબા સમયથી બીમાર હતા. છેલ્લા ઘણા દિવસોથી તેમની તબિયત સારી ન હતી. ગાયકના નિધનના સમાચાર જાણ્યા બાદ સંગીત જગતમાં શોકનો માહોલ છે. પંકજ જેવા ગઝલ ગાયકની વિદાયથી ચાહકો દુઃખી થયા છે. સોશિયલ મીડિયા પર દરેક લોકો ગાયકને અંતિમ શ્રદ્ધાંજલિ આપી રહ્યા છે.