અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પ 20 જાન્યુઆરીએ પોતાના પદના શપથ લેવા જઈ રહ્યા છે. પરંતુ તે પહેલા તેણે પોતાના એજન્ડાને અમલમાં મૂકવાનું શરૂ કરી દીધું છે. ચૂંટણી પહેલા શાંતિની વાત કરનારા ટ્રમ્પે હમાસને ચેતવણી આપી છે કે જો હમાસ તેમના શપથ પહેલા અમેરિકન બંધકોને મુક્ત નહીં કરે તો મધ્ય પૂર્વમાં તેમના માટે નરકના તમામ દરવાજા ખુલી જશે.

જો કે, ટ્રમ્પે એ નથી કહ્યું કે જો હમાસ તેમના શપથ સુધી બંધકોને મુક્ત નહીં કરે તો તેઓ કેવા પ્રકારની કાર્યવાહી કરશે. માર-એ-લાગો ખાતે પ્રેસ કોન્ફરન્સને સંબોધતા ટ્રમ્પે કહ્યું કે, જો બંધકોને છોડવામાં નહીં આવે તો નરકના તમામ દરવાજા ખુલી જશે.

હમાસે 100થી વધુ અમેરિકનને બંધક બનાવ્યા
તેમણે કહ્યું કે, હું વાટાઘાટોની પ્રક્રિયામાં વિક્ષેપ પાડવા માંગતો નથી. પરંતુ જો બંધકોને છોડવામાં નહીં આવે તો મધ્ય પૂર્વમાં નરકના તમામ દરવાજા ખુલી જશે. 7 ઓક્ટોબર 2023ના રોજ હમાસે કેટલાક અમેરિકન નાગરિકો સહિત 100થી વધુ લોકોને બંધક બનાવ્યા હતા.

ટ્રમ્પે શું કહ્યું?
માર-એ-લાગો રિસોર્ટમાં પત્રકારો સાથે વાત કરતા ટ્રમ્પે કેનેડાથી મેક્સિકો, ગ્રીનલેન્ડથી પનામા સુધીના તમામ મુદ્દાઓ પર પોતાની યોજનાઓ વિશે ખુલીને વાત કરી હતી. જ્યારે ટ્રમ્પે કેનેડા અને મેક્સિકો પર પ્રતિબંધો લાદવાના તેમના આહ્વાનને પુનરાવર્તિત કર્યું, ત્યારે તેમણે હમાસને પણ કડક ચેતવણી આપી, જે ઇઝરાયેલી નાગરિકોને બંધક બનાવી રહ્યા છે.

ડેન્માર્ક પર ટેરિફ લાદવાનું વિચારશે
આ દરમિયાન ટ્રમ્પે પનામા કેનાલ અને ગ્રીનલેન્ડ પર સૈન્ય કાર્યવાહીનો ઇન્કાર કર્યો હતો. તેમણે કહ્યું કે, પનામા કેનાલ પર તેમની (પનામા) સાથે હજુ પણ ચર્ચા ચાલી રહી છે. જો કે, એપીના અહેવાલ મુજબ, ટ્રમ્પે પનામા કેનાલ અને ગ્રીનલેન્ડ પર નિયંત્રણ મેળવવા માટે સૈન્ય બળનો ઉપયોગ કરવાની સંભાવનાને નકારી નથી. ટ્રમ્પે કહ્યું કે, તેઓ ગ્રીનલેન્ડને બદલે ડેનમાર્ક પર ટેરિફ લાદવાનું વિચારશે.    

અમેરિકાએ મેક્સિકોમાં મોટું રોકાણ કર્યું 
તેણે ગલ્ફ ઓફ મેક્સિકોનું નામ બદલીને ગલ્ફ ઓફ અમેરિકા કરવાની વાત પણ કરી હતી. તેમણે પ્રેસ કોન્ફરન્સમાં કહ્યું કે, ગલ્ફ ઓફ અમેરિકા આટલું સુંદર નામ છે અને તે ખૂબ જ યોગ્ય છે. મેક્સિકો કાર્ટેલ દ્વારા ચલાવવામાં આવે છે. તે ખૂબ જ જોખમી સ્થળ બની ગયું છે. અમેરિકાએ મેક્સિકોમાં મોટું રોકાણ કર્યું છે અને હવે આપણે જવાબદારી લેવી પડશે.