ઇવી અને સીએનજી કારોની માંગમાં પણ વધારો : વધુ માઇલેજ અને એન્જિન કેપેબીલીટી માટે લોકોની પહેલી પસંદ બની રહી છે એસયુવી

જ્યારે પ્રદૂષણ નિયંત્રણના ધોરણોને કારણે ડીઝલ કારને તબક્કાવાર બંધ કરવા માટે વધુ દબાણ કરવામાં આવી રહ્યું છે, ત્યારે ગુજરાતમાં તેના વેચાણની સંખ્યા તેનાથી વિપરીત થઇ છે. કેન્દ્રીય માર્ગ પરિવહન અને ધોરીમાર્ગ મંત્રાલયના ડેટા સૂચવે છે કે નાણાકીય વર્ષ 2024માં 1.76 લાખ ડીઝલ કારનું વેચાણ થયું હતું, જે નાણાકીય વર્ષ 2023માં 1.24 લાખની સરખામણીએ 42% વધારે છે. એટલું જ નહી પણ પેટ્રોલ કારનું વેચાણ ઘટીને 1.62 લાખ થઈ ગયું હતું. એટલે કે ગયા વર્ષે વેચાણ થયેલી 1.79 લાખ કાર સામે 10% નીચું આવી પહોચ્યું છે.

ઓટોમોબાઈલ ડીલર્સ એસોસિએશન ગુજરાત ફેડરેશનના વરિષ્ઠ અધિકારીએ જણાવ્યું હતું કે, કાર ડીલરોના મતે, ડીઝલ કારના વેચાણમાં ઉછાળો ડીઝલ ધરાવતી એસયુવીની વધતી માંગને કારણે છે. જે ગ્રાહક એસયુવી ખરીદે છે તેના માટે બજેટની મર્યાદા નહીં હોય અને તેથી વધુ માઇલેજ અને એન્જિન ક્ષમતા માટે તે ડીઝલને પસંદ કરશે. પરિણામે, ડીઝલ કારના વેચાણમાં દેખીતી રીતે તીવ્ર વધારો થયો છે. છેલ્લા નાણાકીય વર્ષ દરમિયાન ગુજરાતમાં છૂટક વેચાણ કરાયેલા કુલ પેસેન્જર વાહનોમાં ડીઝલ કારનો હિસ્સો 39.2% છે. ડીઝલ વેરિઅન્ટની માંગ પેટ્રોલ વેરિઅન્ટને વટાવી ગઈ છે, જે કુલ વેચાણમાં લગભગ 36% હિસ્સો ધરાવે છે.

રસપ્રદ વાત એ છે કે પેટ્રોલ વાહનોના વેચાણમાં અચાનક 9.75%નો ઘટાડો નોંધાયો છે. બીજી તરફ, ઈવી અને સીએનજી સમકક્ષોને કારણે પેટ્રોલ કારના વેચાણનો નોંધપાત્ર હિસ્સો ખાઈ ગયો છે. વધુમાં, એન્ટ્રી લેવલ કારની માંગમાં થયેલા ધોવાણને કારણે પેટ્રોલ કારના વેચાણમાં નોંધપાત્ર ઘટાડો થયો છે. એક કાર ડીલરશીપના સીઈઓએ જણાવ્યું હતું કે, "છેલ્લા દોઢ વર્ષમાં એન્ટ્રી લેવલ કારના વેચાણમાં ઘટાડો થયો છે. એસયુવીની વધુ માંગ વચ્ચે, સેડાનની એટલી માંગ નથી. વધુમાં, જ્યારથી બીએસવીઆઈ એન્જિન ફરજિયાત કરવામાં આવ્યા છે, ત્યારથી કંપની ફીટેડ સીએનજી કાર પોસાય તેવા ભાવે ઉપલબ્ધ રહી નથી. પરિણામે, સીએનજી કાર પણ પેટ્રોલ કારનો હિસ્સો ખાઈ રહી છે. અમારી ડીલરશીપ પર, કેટલાક સૌથી વધુ વેચાતા મોડલમાંથી લગભગ 80% સીએનજી વેરિઅન્ટ્સમાંથી આવે છે. જે ગ્રાહકો કાર પરવડી શકે છે તેઓ પણ હાઇબ્રિડ ઇંધણવાળા વાહનોને પસંદ કરી રહ્યા છે. જો સરકાર હાઇબ્રિડ વાહનો પર ટેક્સને તર્કસંગત બનાવે છે, તો આવી કારની માંગમાં વધારો થશે.”

કેન્દ્રીય માર્ગ પરિવહન અને ધોરીમાર્ગ મંત્રાલયના ડેટા અનુસાર, ગુજરાતમાં નાણાકીય વર્ષ 2024 દરમિયાન લગભગ 1.04 લાખ સીએનજી કારનું વેચાણ થયું હતું. આનો અર્થ એ છે કે કુલ કાર વેચાણમાં સીએનજી કાર 23.1% હિસ્સો ધરાવે છે. નાણાકીય વર્ષ 2023 માં વેચાયેલી 66,817 સીએનજી કારની સરખામણીએ નાણાકીય વર્ષ દરમિયાન વેરિઅન્ટે વેચાણમાં 56% વૃદ્ધિ નોંધાવી હતી.