છેલ્લા કેટલાક વર્ષોથી યુવાનોમાં ટેટૂ અને પિયર્સિંગનું ચલણ ધીમે ધીમે વધી રહ્યું છે. શોખ કે દેખાદેખીને કારણે મોટાભાગના લોકોના શરીર પર ઓછામાં ઓછું એક ટેટૂ તો જોવા મળે જ છે, પણ એક કપલ એવું છે જેણે પોતાનું આખું શરીર ટેટુથી ચીતરી નાખ્યું છે.
​​​​​​​

છેલ્લા કેટલાક દિવસોથી ચર્ચામાં રહેલ આર્જેન્ટિનાના એક કપલને જોઈને લોકો આજકાલ કંઈક આવું જ કહી રહ્યા છે, આ કપલના 98 ટકા શરીર પર ટેટૂ છે અને 91 બોડી મોડિફિકેશન કરાવીને ગિનિસ વર્લ્ડ રેકોર્ડ બનાવ્યો છે. આ પહેલા વર્ષ 2014માં આ જ કપલે 84 મોડિફિકેશન કરાવીને વર્લ્ડ રેકોર્ડ બનાવ્યો હતો. હવે ગેબ્રિએલા અને વિક્ટરે પોતાનો જ રેકોર્ડ તોડી નાખ્યો છે. વિક્ટરે તેનું પહેલું ટેટૂ 11 વર્ષની ઉંમરે કરાવ્યું હતું પણ ગેબ્રિએલાના લગ્નના એક વર્ષ સુધી કોઈ બોડી મોડિફિકેશન કરાવ્યું ન હતું. વિક્ટરનું પહેલું ટેટૂ ગેબ્રિએલાને એટલું ગમ્યું કે તેને પણ બોડી મોડિફિકેશન કરાવવાનું મન બનાવી લીધું હતું.

કપલે તેમના શરીર પર 50 પિયર્સિંગ, 8 માઇક્રોડર્મલ્સ, 14 બોડી ઇમ્પ્લાન્ટ્સ, 5 ડેન્ટલ ઇમ્પ્લાન્ટ્સ, 4 ઇયર એક્સ્પાન્ડર, 2 ઇયર બોલ્ટ્સ અને 1 ફોર્ક્ડ ટંગ કરાવ્યા છે. એટલું જ નહીં, બંનેએ તેમની આંખોના સફેદ ભાગ પર પણ ટેટૂ કરાવ્યા છે, જેથી તેમની આંખો સંપૂર્ણપણે કાળી દેખાય.