ચીનના ટોચના વૈજ્ઞાનિકે દાવો, હોંગકોંગ યુનિવર્સિટીના વૈજ્ઞાનિકે ફગાવી દલીલો

ચીનના એક ટોચના વૈજ્ઞાનિકે ભારતની ઐતિહાસિક સિદ્ધિ પર વિવાદિત નિવેદન આપ્યું છે અને દાવો કર્યો છે કે ભારતનું ચંદ્ર મિશન ચંદ્રયાન-૩ ચંદ્રના દક્ષિણ ધ્રુવમાં કે તેની આસપાસ ઉતર્યું નથી. ભારતની આ સફળતા પર કોઈએ પ્રશ્ન કે વિવાદ કર્યો નથી અને નાસા અને યુરોપિયન સ્પેસ એજન્સીએ ચંદ્રની દૂર બાજુની નજીક સોફ્ટ લેન્ડિંગ માટે ઈસરોના વૈજ્ઞાનિકોની પ્રશંસા કરી છે.

આ ચોંકાવનારો દાવો એવા સમયે કરવામાં આવ્યો છે જ્યારે ભારતીય વૈજ્ઞાનિકો વિક્રમ લેન્ડર અને પ્રજ્ઞાન રોવરને બે અઠવાડિયાની ઠંડી ચંદ્ર રાત્રિ પછી ફરી સક્રિય કરવાની કોશિશ કરી રહ્યા છે. ચીનના પ્રથમ ચંદ્ર મિશનના મુખ્ય વૈજ્ઞાનિક - ચીની કોસ્મોકેમિસ્ટ ઓયાંગ ઝિયુઆન દ્વારા બુધવારે આ ટિપ્પણીઓ કરવામાં આવી હતી. ચાઈનીઝ એકેડેમી ઓફ સાયન્સના સભ્ય ઓઉયાંગે કહ્યું, 'ચંદ્રયાન-૩નું લેન્ડિંગ સાઈટ ચંદ્રના દક્ષિણ ધ્રુવ પર ન હતું, ન તો ચંદ્રના દક્ષિણ ધ્રુવના ધ્રુવીય ક્ષેત્રમાં હતું, ન તો તે 'એન્ટાર્કટિક ધ્રુવીય ક્ષેત્રની નજીક' હતું.’ ઓયાંગે સ્થાનિક અખબારને આ તમામ બાબતો જણાવી છે.

પૃથ્વી પર, દક્ષિણ ધ્રુવને ૬૬.૫ અને ૯૦ ડિગ્રી દક્ષિણની વચ્ચે વ્યાખ્યાયિત કરવામાં આવે છે, કારણ કે તેની પરિભ્રમણીય ધરી સૂર્યની તુલનામાં લગભગ ૨૩.૫ ડિગ્રી પર નમેલી છે. ઓયાંગ દલીલ કરે છે કે ચંદ્રનો ઝુકાવ માત્ર ૧.૫ ડિગ્રી હોવાથી, ધ્રુવીય પ્રદેશ ખૂબ નાનો છે. નાસાનો અંદાજ છે કે ચંદ્રનો દક્ષિણ ધ્રુવ ૮૦ થી ૯૦ ડિગ્રી છે, જ્યારે ઓયાંગે કહ્યું કે તે માને છે કે તે ૮૮.૫ થી ૯૦ ડિગ્રી પર પણ નાનો છે, જે ચંદ્રના ૧.૫ ડિગ્રી ઝુકાવને પ્રતિબિંબિત કરે છે.

હોંગકોંગ યુનિવર્સિટીની સ્પેસ રિસર્ચ લેબોરેટરીના એક વૈજ્ઞાનિકે ઓયાંગના પાયાવિહોણા દાવાઓને ફગાવી દીધા છે. હોંગકોંગ યુનિવર્સિટીના સ્પેસ રિસર્ચ લેબોરેટરીના ડિરેક્ટર ક્વેન્ટિન પાર્કરે જણાવ્યું હતું કે, 'જ્યારે તમે દક્ષિણ ધ્રુવની નજીક રોવર લેન્ડ કરો છો, તેને ચોક્કસપણે દક્ષિણ ધ્રુવ પ્રદેશ તરીકે વ્યાખ્યાયિત કરવામાં આવે છે, તે પહેલેથી જ એક મોટી સિદ્ધિ છે.