બોલિવૂડ અભિનેતાના ઘર બહારના સીસીટીવીમાં કેદ થયા બંને શખ્સ : એક મર્ડરના કેસમાં મોસ્ટ વોંટેડ આરોપી 

ગતરોજ મુંબઈમાં બોલિવૂડ અભિનેતા સલમાન ખાનના ઘરની બહાર મોટરસાઇકલ પર સવાર બે અજાણ્યા શખ્સોએ ગોળીબાર કર્યો હતો. બંનેની શોધખોળ હજુ ચાલુ છે. આ મામલે મહારાષ્ટ્રના મુખ્યમંત્રી એકનાથ શિંદેએ સલમાન ખાન સાથે વાત કરી હતી. આ દરમિયાન સલમાન ખાનના ઘરની બહાર સુરક્ષા વધારી દેવામાં આવી છે. 

પોલીસે જણાવ્યું હતું કે બાંદ્રા વિસ્તારમાં ગેલેક્સી એપાર્ટમેન્ટની બહાર સવારે લગભગ 5 વાગ્યે બે વ્યક્તિઓએ ચાર ગોળીઓ ચલાવી હતી. આ બિલ્ડિંગમાં સલમાન ખાન રહે છે. ફાયરિંગ કર્યા બાદ બંને આરોપીઓ બાંદ્રા રેલવે સ્ટેશન પહોંચ્યા હતા. સ્ટેશનના પ્લેટફોર્મ નંબર 1 પરથી સવારે 5.08 વાગ્યે બોરીવલી લોકલ ટ્રેન પકડી અને સાંતાક્રુઝ સ્ટેશનના પ્લેટફોર્મ નંબર 3 પર સાંજે 5.13 કલાકે નીચે ઉતર્યા હતા. અહીંથી બંને ઓટો પકડીને નીકળ્યા હતા.

મુંબઈ પોલીસ ઓટો રિક્ષા ચાલકનું નિવેદન નોંધી રહી છે. ઓટો ડ્રાઈવર ઉપરાંત આરોપીને જોનારા કેટલાક લોકોના નિવેદન પણ નોંધવામાં આવી રહ્યા છે. દરમિયાન સમાચાર એજન્સી પીટીઆઈએ સૂત્રોને ટાંકીને જણાવ્યું હતું કે સીસીટીવી ફૂટેજમાં અભિનેતા સલમાન ખાનના ઘરની બહાર ગોળીબાર કરતા જોવા મળેલા બેમાંથી એક વ્યક્તિ ગુરુગ્રામનો હોવાની આશંકા છે. પોલીસે સલમાન ખાનના ઘરથી લગભગ એક કિલોમીટર દૂર એક મોટરસાઈકલ રિકવર કરી છે. દિલ્હી પોલીસે જણાવ્યું કે ગુરુગ્રામનો આરોપી હરિયાણામાં હત્યા અને લૂંટની ઘણી ઘટનાઓમાં સામેલ છે. તે માર્ચમાં ગુરુગ્રામ સ્થિત બિઝનેસમેન સચિન મુંજાલની હત્યા કેસમાં વોન્ટેડ છે.

વિદેશ સ્થિત ગેંગસ્ટર રોહિત ગોદરાએ કથિત સોશિયલ મીડિયા પોસ્ટ દ્વારા મુંજાલની હત્યાની જવાબદારી લીધી હતી. તે ગેંગસ્ટર લોરેન્સ બિશ્નોઈ, તેના ભાઈ અનમોલ અને ગોલ્ડી બ્રારનો નજીકનો સહયોગી છે. પોલીસ સૂત્રોએ જણાવ્યું હતું કે સલમાન ખાનના ઘરની બહાર ફાયરિંગના થોડા કલાકો પછી, અનમોલ બિશ્નોઈએ કથિત ઓનલાઈન પોસ્ટ દ્વારા આ ઘટનાની જવાબદારી લીધી હતી. સલમાન ખાનને ચેતવણી જારી કરીને કહ્યું કે આ ટ્રેલર છે.

સમગ્ર મામલાને લઈને મુખ્યમંત્રી એકનાથ શિંદેએ કહ્યું કે મેં મુંબઈ પોલીસ કમિશનર અને અભિનેતા સલમાન ખાન સાથે વાત કરી અને તેમને સંપૂર્ણ સમર્થન આપ્યું છે. ગયા વર્ષે માર્ચમાં, સલમાન ખાનની ઓફિસને ઈ-મેલ મોકલીને ધમકીભર્યો પત્ર મોકલવામાં આવ્યો હતો, જેના પગલે મુંબઈ પોલીસે ગેંગસ્ટર લોરેન્સ બિશ્નોઈ વિરુદ્ધ ભારતીય દંડ સંહિતાની કલમ 120-બી (ગુનાહિત કાવતરું) હેઠળ કેસ દાખલ કર્યો હતો. ગોલ્ડી બ્રાર સહિત અન્ય કલમો હેઠળ એફઆઈઆર નોંધવામાં આવી હતી.

પોલીસે અગાઉ કહ્યું હતું કે ઈ-મેલમાં કહેવામાં આવ્યું હતું કે ખાને લોરેન્સ બિશ્નોઈ દ્વારા એબીપી ચેનલને આપેલો ઈન્ટરવ્યુ જોયો હશે. ઈ-મેલમાં કહેવામાં આવ્યું હતું કે જો ખાન આ મામલો બંધ કરવા ઈચ્છે છે તો તેણે ગોલ્ડીભાઈ સાથે રૂબરૂ વાત કરવી જોઈએ. સલમાન ખાનને આ પહેલા પણ ઘણી વખત ધમકીઓ મળી ચુકી છે. આ પહેલા જૂન 2022માં ખાનને ધમકીભર્યો પત્ર લખવામાં આવ્યો હતો. આ પછી સુરક્ષા વધારી દેવામાં આવી હતી.