થોડા દિવસ પહેલા આજે રાજ્યના હવામાન વિભાગ દ્વારા શિયાળામાં વરસાદની આગાહી કરવામાં આવી હતી. રાજ્યના ખેડૂતો માટે આ ચિંતાજનક સમાચાર છે. રાજ્યમાં 24 નવેમ્બરથી લઈને 27 નવેમ્બર દરમિયાન જુદા-જુદા વિસ્તારોમાં કમોસમી વરસાદની આગાહી કરાઈ હતી. 

ત્યારે આજે અમરેલી, રાજકોટ અને કચ્છમાં વહેલી સવારથી જ વરસાદી ઝાપટા જોવા મળી રહ્યા છે. રાજકોટ જિલ્લાના જેતપુર અને વીરપુરમાં ગાજવીજ સાથે ધીમીધારે વરસાદ શરૂ થયો છે, તો રાજકોટ શહેરની સ્થિતિ પણ કંઈક આવી જ છે. ભારે પવન સાથે વરસાદ શરૂ થતા ખેડૂતો ચિંતામાં મુકાયા છે અને હાલ ખેતરમાં ઉભેલા શિયાળુ પાકને નુકસાન જવાની ભીતી સેવાઈ રહી છે. રાજકોટના મોટાભાગના વિસ્તારોમાં મેઘ ગર્જના સાથે ધીમી ધારે વરસાદ શરૂ થયો છે, અને કેટલાક વિસ્તારોમાં વીજપુરવઠો ખોરવાયો હોવાના પણ સમાચાર છે. આજ માટે રાજ્યના તમામ જિલ્લાઓમાં વરસાદની આગાહી કરવામાં આવી છે.

હવામાન વિભાગના જણાવ્યા મુજબ એક નવું વેસ્ટર્ન ડિસ્ટર્બન્સ ઉત્તર-પશ્ચિમ ભારત પર આવશે. આ સિસ્ટમ ગુજરાત સહિત, અરબી સમુદ્ર તથા મહારાષ્ટ્ર અને બીજા વિસ્તારો સુધી અસર કરશે.

હવામાન વિભાગની આગાહી મુજબ ભુજ-નખત્રાણા તાલુકામાં વરસાદી ઝાપટા પડ્યા છે. મોડી રાત્રે 3 વાગે વરસાદના પગલે અનેક જગ્યાએ વીજપુરવઠો ખોરવાયો હતો.